Uashingtoni sinjalizon masa të ashpra: Letra e kongresmenëve amerikanë vë në shënjestër zyrtarët e korruptuar në Shqipëri

Një letër zyrtare e dërguar nga dy ligjvënës republikanë amerikanë, Joe Wilson dhe Keith Self, drejtuar Sekretarit të Shtetit, Marco Rubio, ka sjellë sërish në qendër të vëmendjes ndërkombëtare shqetësimet e thella mbi standardet e demokracisë, nivelin e korrupsionit dhe mbarëvajtjen e shtetit të së drejtës në Shqipëri. Përmes këtij dokumenti, kongresmeni nga Karolina e Jugut, Joe Wilson, dhe ai nga Teksasi, Keith Self — i cili drejton gjithashtu Nënkomisionin për Evropën në Dhomën e Përfaqësuesve — i kanë bërë thirrje ekzekutivit amerikan që të marrë në shqyrtim aplikimin e sanksioneve dhe kufizimeve të vizave për zyrtarët e lartë shqiptarë që dyshohet se janë të përfshirë në afera korruptive me peshë. Krerët e kësaj nisme kanë shprehur gjithashtu rezerva serioze lidhur me ecurinë e reformës në drejtësi, duke vënë në dukje se, pavarësisht mbështetjes financiare dhe politike të deritanishme nga ana e Shteteve të Bashkuara, arritjet mbeten tejet të brishta dhe mbartin rrezikun e rikthimit pas. Në këtë kuadër, ata kanë kërkuar aktivizimin e mundshëm të nenit 7031(c) të legjislacionit federal amerikan, dispozitë kjo që i jep të drejtë Uashingtonit të ndalojë hyrjen në territorin e SHBA-së për çdo zyrtar të huaj për të cilin ekzistojnë të dhëna të besueshme për korrupsion madhor. Vlen të theksohet se masa të ngjashme mund të shtrihen edhe te pjesëtarët e familjeve të tyre të ngushta. Vëmendje e veçantë brenda letrës i është kushtuar edhe rastit të ish-zëvendëskryeministres Belinda Balluku, e cila është vënë nën hetim për shkak të dyshimeve mbi ndërhyrjet në proceset e prokurimit publik. Tentativa e prokurorëve për t'i hequr imunitetin me qëllim arrestimin e saj dështoi në Kuvend, ndërkohë që kryeministri Edi Rama e pati kundërshtuar hapur këtë lëvizje, duke e cilësuar si veprim antikushtetues. Krahas këtyre çështjeve, dy kongresmenët kanë kërkuar të dhëna të detajuara mbi ndihmën amerikane për sistemin e drejtësisë dhe bashkëpunimin ndërmjet Ambasadës së SHBA-së në Tiranë dhe institucioneve vendase për garantimin e sigurisë së protestuesve dhe gazetarëve, duke vënë afat deri më 5 nëntor për marrjen e përgjigjeve zyrtare. Kjo zhvillim i fundit ka ngritur dilema të forta nëse Uashingtoni po përgatit një linjë sjelljeje shumë më rigoroze ndaj kastës politike shqiptare të dyshuar për abuzim me pushtetin, dhe nëse frenimi i lëvizjeve të tyre do të ketë ndikim të ndjeshëm në skenën politike vendase. Pavarësisht kësaj, mbetet për t'u parë nëse shqetësimet e ngritura nga Uashingtoni do të materializohen në vendime konkrete dhe se çfarë fature do t'i kushtojnë ato raporteve bilaterale ndërmjet Shqipërisë dhe Shteteve të Bashkuara. Lidhur me këto ngjarje, analistët dhe publicistët Ilir Çumani dhe Llesh Ndoj kanë ndarë opinionet e lor rreth sinjaleve që vijnë nga Kongresi amerikan, mundësisë reale të bllokimit të vizave dhe pasojave që këto masa do të linin në politikën shqiptare. Duke komentuar letrën e ligjvënësve amerikanë, publicisti nga Shqipëria, Ilir Çumani, u shpreh se ky veprim nuk duhet trajtuar thjesht si një lëvizje burokratike diplomatike, por si një kambanë alarmi për llogaridhënien e zyrtarëve publikë dhe detyrimin e zbatimit të ligjshmërisë. Sipas vlerësimit të tij, abuzimet në majat e pushtetit përbëjnë rrezik direkt për rendin demokratik, interesat e qytetarëve dhe besueshmërinë ndaj shtetit. “Letra e dy kongresmenëve amerikanë, Joe Wilson dhe Keith Self, drejtuar Sekretarit amerikan të Shtetit, Marco Rubio, nuk duhet parë thjesht si një zhvillim diplomatik apo si një tjetër deklaratë që do të kalojë pa lënë gjurmë në politikën shqiptare”, ka theksuar ai.