Artan Hoxha: Dhuna e paprecedentë ndaj qytetarëve në protestë zbulon fytyrën e vërtetë të pushtetit

I ftuar në një studio televizive, gazetari investigativ Artan Hoxha ka analizuar zhvillimet e fundit të protestave të organizuara, duke u ndalur gjerësisht te përdorimi i forcës dhe trajtimi i qytetarëve nga strukturat e rendit. Sipas tij, gjatë tubimeve është kaluar çdo kufi i reagimit institucional, duke përfshirë hedhjen e gazit lotsjellës në zona të banuara, rrugica dhe deri në hapësirat e lokaleve. Hoxha ngriti shqetësimin se lloji i gazit të përdorur mund të jetë nga ato substanca që nuk lejohen në vendet e Bashkimit Evropian, ndërsa theksoi se përdorimi i plumbave të gomës është bërë në shkelje të hapur të rregulloreve, duke rrezikuar seriozisht jetën e njerëzve në turmë. “Janë goditur pa dallim gazetarë, adoleshentë, vajza dhe qytetarë të moshuar. Drejtimi iu la njerëzve që nuk ishin të aftë ta menaxhonin këtë situatë, dhe pasojë e kësaj është krijuar një urrejtje e madhe publike ndaj policisë”, u shpreh ai, duke shtuar se qeveria ka kaluar në një fazë presioni, me identifikime dhe arrestime banesash ndaj protestuesve më aktivë. Duke paralajmëruar një fazë të re të pakënaqësisë popullore, gazetari u shpreh se qytetarët e prekur nga dhuna dhe procedimet penale ndodhen para një zgjedhjeje madhore për të ardhmen e tyre. Ai kritikoi ashpër qasjen e kryeministrit Edi Rama ndaj protestuesve, duke e cilësuar atë si të papranueshme dhe të ngjashme me praktikat e kaluara të regjimeve autoritare, ndërsa përfundoi se “Antifa në Shqipëri është Edi Rama dhe strukturat e tij”.