Jeta pas të tërheqjes nga skijimi, Lara Gut-Behrami: Pa garat, gjithçka është bërë më e bukur

Karriera e suksesshme e Lara Gut-Behramit mori fund përfundimisht gjatë muajve të verës. Tani, skiatorja e njohur zvicerane nga kantoni i Tiçinos ka thyer heshtjen, duke rrëfyer për herë të parë detajet e vendimit të saj për të mos u rikthyer më në pistat e garave, pavarësisht se në horizont po afrohej Kampionati Botëror në shtëpi. Në fillim të muajit gusht, 35-vjeçarja Lara Gut-Behrami zyrtarizoi largimin e saj përfundimtar nga skijimi aktiv. Ky vendim erdhi si pasojë e dëmtimit të rëndë që pësoi në nëntor të vitit të kaluar, kur i u këput ligamenti i kryqëzuar i gjurit, duke e pamundësuar rikthimin e saj në skenën e Kupës së Botës. Kampionja olimpike në Super-G dhe dy herë kampionja e botës, në sllallomin e madh dhe Super-G, ka folur gjerësisht për këtë kthesë të madhe në jetën e saj. “Që kur nuk garoj më, gjithçka është bërë dukshëm më e bukur”, u shpreh skiatorja nga Tiçino gjatë një interviste për gazetën zvicerane “Tages-Anzeiger”. Ajo ka shpjeguar se tashmë ndihet e çliruar nga tensioni i vazhdueshëm dhe se nuk ushtron më presion mbi veten, pasi nuk ka më mbi supe detyrimin e përhershëm për të arritur rezultate dhe për të fituar. Gjatë rrugëtimit të saj sportiv, Gut-Behrami ka arritur kulmin e suksesit. Përveç titujve në garat madhore, ajo numëron 48 fitore në Kupën e Botës, është ngjitur 101 herë në podium, ndërsa ka rrëmbyer gjashtë globe të vogla dhe dy globe të mëdha të Kupës së Botës. Duke folur për tranzicionin nga sportistja aktive në pensioniste, ajo pranon se ndryshimi nuk ka qenë aq drastik sa kishte imagjinuar. “Jam ende i njëjti person”, thekson Gut-Behrami. Shumë aspekte të përditshmërisë kanë mbetur të pandryshuara, si orari i gjumit apo zakonet e të ushqyerit. Megjithatë, ajo gëzon lirinë e re ku nuk ka nevojë të shqetësohet pa fund për parashikimet e motit dhe mund të shijojë një film deri në mesnatë pa u menduar dy herë. Pavarësisht pensionimit, ajo nuk e ka braktisur plotësisht stërvitjen. “Unë ende stërvitem. Por tashmë nuk ka të bëjë më me atë se sa peshë ngre, por me atë që më bën mirë”, tregon ajo. E pyetur rreth zërave nga rrethi i saj se ajo po stërvitej intensivisht për një rikthim të mundshëm, Gut-Behrami u përgjigj prerazi se në fillim as nuk e kishte shqyrtuar seriozisht një opsion të tillë. Qëllimi i saj i vetëm ishte rikuperimi i plotë dhe kthimi te shëndeti i plotë prej 100 për qind. Vetëm gjatë korrikut, kur gjendja e saj fizike u përmirësua mjaftueshëm për t'i lejuar rikthimin në ski, ajo i shtroi vetes pyetjen nëse po ndjehej ende e përmbushur. Përgjigjja e saj e brendshme ishte negative. Njëkohësisht, ajo thekson se për të kishte një rëndësi parësore që karriera të mbyllet me vullnetin e saj dhe jo e detyruar nga dëmtimet e trupit. “Vendimi ishte në duart e mia”, shton ajo, duke vlerësuar se përvojat e kaluara ishin jashtëzakonisht pasuruese, por çdo hap i mëtejshëm në gara nuk do të kishte më kuptim. As kampionati në Crans-Montana të kantonit Valais nuk përbënte një shtysë të mjaftueshme për të ndryshuar mendje. “Edhe një medalje e artë nuk do t'i vlente muajve që do të duhej t'i sakrifikoja”, deklaroi ajo me bindje. Sot, Lara Gut-Behrami ndihet plotësisht e qetë me zgjedhjen e saj dhe me kapitullin e ri të jetës larg sportit elitar. “Gjithçka bëhet më e vështirë me kalimin e moshës”, përfundon ajo.