Ekstraduar nga Gjermania, Gjykata e Posaçme lë në qeli Ardit Gjokrosën

Pas ekstradimit të tij dy ditë më parë nga Gjermania, Ardit Gjokrosa është vendosur zyrtarisht në qelitë e paraburgimit, pas vendimit të marrë nga Gjykata e Posaçme. Trupi gjykues ka zhvilluar këtë të martë seancën për verifikimin e masës së sigurisë të caktuar më parë në mungesë, duke lënë në fuqi detyrimin e shtrëngues "Arrest në burg". Ndaj Gjokrosës rëndojnë akuza të rënda penale, ku përfshihen "Sigurimi i kushteve dhe i mjeteve materiale për të kryer vrasje" në dëm të shtetasit Hamza Terziu. Këto vepra penale dyshohet se janë kryer në kuadër të bashkëpunimit të posaçëm të grupit të strukturuar kriminal, duke përfshirë akuzat për pjesëmarrje në të, si dhe "Kryerja e veprave penale nga organizata kriminale dhe grupi i strukturuar kriminal". Në përfundim të shqyrtimit gjyqësor, Gjykata e Posaçme e Shkallës së Parë për Korrupsionin dhe Krimin e Organizuar, me trup gjykues të kryesuar nga gjyqtari Erjon Çela, vendosi zyrtarisht vazhdimin e masës së sigurimit personal "Arrest në burg" për të pandehurin. GJKKO ka njoftuar se i është dhënë urdhër Policisë Gjyqësore që Ardit Gjokrosa të shoqërohet menjëherë drejt institucionit të paraburgimit, ku do të qëndrojë nën dispozicion të autoriteteve hetimore. Gjithashtu, Prokuroria e Posaçme kundër Korrupsionit dhe Krimit të Organizuar, së bashku me policinë gjyqësore, janë ngarkuar me detyrën e ekzekutimit të këtij vendimi. Palët e interesuara kanë të drejtë të ushtrojnë ankimim kundër këtij vendimi në Gjykatën e Posaçme të Apelit për Korrupsionin dhe Krimin e Organizuar, brenda një afati prej 5 ditësh nga dita e njoftimit zyrtar të vendimit të shkallës së parë.