Përplasja në Mitrovicë: LDK-ja rrezikon shkarkimin e degës pas fyerjeve të Faton Pecit

Kryetari i Forumit të Rinisë së LDK-së, Shpat Neziri, ka reaguar ashpër pas deklaratave fyese të ministrit Faton Peci drejtuar Lidhjes Demokratike të Kosovës, duke kërkuar masa të menjëhershme ndaj zyrtarëve lokalë të kësaj partie në Mitrovicë. Neziri ka kërkuar që kryesuesi i Kuvendit Komunal të Mitrovicës, Safet Kamberi, të distancohet publikisht nga gjuha e përdorur nga Peci, si dhe ka kërkuar shkarkimin e Gazmend Asllanit nga pozita e drejtorit të Drejtorisë për Kulturë, Rini dhe Sport (DKRS). Sipas tij, këto hapa janë të domosdoshëm për ruajtjen e integritetit institucional dhe politik të subjektit. Në reagimin e tij, kreu i të rinjve të LDK-së ka theksuar se në mungesë të veprimit nga ana e kryetarit të degës, udhëheqja lokale duhet t'i përjashtojë Kamberin dhe Asllanin nga të gjitha funksionet partiake, ndërsa Kamberi duhet të largohet menjëherë edhe nga grupi i asamblistëve të LDK-së. Neziri ka shkuar më tej duke i bërë thirrje kryetarit qendror të partisë, Lumir Abdixhiku, që të ndërhyjë urgjentisht nëse struktura drejtuese në Mitrovicë tregohet e pasigurt apo heziton të veprojë. "Nëse kryetari i degës nuk ka guxim t’i bëjë këto veprime, atëherë kryetari i partisë, Lumir Abdixhiku, ta shkarkojë të gjithë degën e LDK-së në Mitrovicë", ka deklaruar Neziri.