Paketa e Zgjerimit të BE-së për Shqipërinë: Marta Kos zbardh raportin e ri më 4 nëntor

Komisionerja e re Evropiane për Zgjerimin, Marta Kos, do të paraqesë zyrtarisht Pakon e Zgjerimit për vitin 2026 më 4 nëntor, sipas njoftimit zyrtar të bërë të ditur nga Parlamenti Evropian. Kjo paketë e rëndësishme përmban vlerësimet e detajuara të Komisionit Evropian për dhjetë shtete që synojnë anëtarësimin në Bashkimin Evropian, qofshin ato vende kandidate apo kandidate potenciale, ku bën pjesë edhe Shqipëria. Pas publikimit të gjetjeve mbi ecurinë e reformave evropiane në secilin shtet, Raportuesit e Përhershëm të Komitetit për Punë të Jashtme (AFET) do të angazhohen në hartimin e projektrezolutave të veçanta për çdo vend. Dokumentet në fjalë do të pasqyrojnë qëndrimet zyrtare dhe rekomandimet e Parlamentit Evropian lidhur me ecurinë e integrimit evropian të këtyre vendeve. Dita e ardhshme, më 5 nëntor, do t'i kushtohet një debati të gjërë në Parlamentin Evropian mbi mekanizmat financiarë dhe instrumentet mbështetëse për Ballkanin Perëndimor, Ukrainën dhe Moldavinë. Në këtë kuadër, anëtarët e Komitetit për Punë të Jashtme (AFET) dhe ata të Komitetit për Buxhete do të bashkojnë forcat për të mbajtur dialogun e pestë për instrumentin e rritjes dhe reformave në Ballkanin Perëndimor, dialogun e tretë për Moldavinë, si dhe dialogun e gjashtë dedikuar Ukrainës. Gjithashtu, gjatë këtyre zhvillimeve, Drejtori i Përgjithshëm për Fqinjësi dhe Negociata për Zgjerim në Komisionin Evropian, Gert Jan Koopman, do të paraqitet para eurodeputetëve për t'i njohur ata me ecurinë aktuale të agjendave të reformave dhe procesin e disbursimit të fondeve evropiane.