Paraqitja në Prokurorinë Speciale, Përparim Rama: Misioni im është zhvillimi i kryeqytetit

Kryetari i Komunës së Prishtinës, Përparim Rama, ka dhënë një prononcim të shkurtër për gazetarët pak momente përpara se të hynte brenda ambienteve të Prokurorisë Speciale për t'u marrë në pyetje. “Detyra ime është që të ndërtoj kryeqytetin, detyra e tyre është me pa që krejt bëhet në mënyrë ligjore”, u shpreh ai para mediave. I pyetur nga gazetarët lidhur me cilësinë në të cilën do të paraqitet përballë organit të akuzës, mbrojtësi ligjor i kreut të komunës, avokati Artan Qerkini, theksoi se “statusin do ta kuptojmë intervistimit”. Burimet bëjnë me dije se kreu i Prishtinës pritet të merret në pyetje si i pandehur në lidhje me zhvillimin dhe mbarëvajtjen e projektit të njohur si “Arkitekti i Kryeqytetit”. Hetimet dhe dyshimet lidhur me këtë nismë për qytetin e Prishtinës fokusohen te aspektet e prokurimit publik, shifra e lartë financiare e kontratës që arrin në 12 milionë euro, si dhe te dyshimet e ngritura për parregullsi në përzgjedhjen e stafit dhe ekzistencën e mundshme të konfliktit të interesit.