Mauro Icardi synon rikthimin e bujshëm në Serie A: Te Interi bëra gabime, sot jam më i pjekur

Sulmuesi i njohur argjentinas, Mauro Icardi, ka bërë të qartë se nuk e ka ndër mend të tërhiqet nga futbolli i luajtur dhe tashmë i ka idetë e qarta lidhur me hapat e tij të ardhshëm në karrierë. Aktualisht, 33-vjeçari gjendet në statusin e lojtarit të lirë, pas përfundimit të bashkëpunimit me skuadrën e Galatasarayt në mbyllje të edicionit të kaluar. Pavarësisht kësaj periudhe pasiviteti, Icardi këmbëngul se ende nuk ka thënë fjalën e fundit në fushën e blertë dhe se ka kapacitetin për të kontribuar edhe për disa vite të tjera në nivelet më të larta. Në planet e tij, rikthimi në futbollin italian përbën një dëshirë të madhe, ndërsa nuk ka ngurruar të prekë edhe temat e kaluara rreth eksperiencës së tij me fanellën e Interit. "Stërvitem me intensitet maksimal për t'u dëshmuar në fushë atyre që mendojnë se cikli im ka marrë fund. Dëshira ime më e madhe është të luaj sërish në Itali", ka deklaruar Icardi në një prononcim për gazetën italiane *La Repubblica*. Duke iu referuar periudhës te zikaltrit, ai shtoi: "Sa i përket Interit, heqja e shiritit të kapitenit ishte një goditje e rëndë për mua. Kam bërë gabime në menaxhimin e disa situatave, por sot do të tregohesha shumë më i qetë dhe më i matur. Jam rritur si njeri dhe si lojtar". Gjatë karrierës së tij të pasur me skuadrat e ndryshme, Mauro Icardi ka dëshmuar instinktin e tij prej golashënuesi klasik, duke u paraqitur në 478 takime zyrtare dhe duke gjetur rrugën e rrjetës plot 250 herë.