Revolucioni te Barcelona: Synohet Harry Kane, tre yje në shitje për të mbledhur 150 milionë euro

Klubi i Barcelonës po përgatit ndryshime rrënjësore për sesionin e ardhshëm të transferimeve, me qëllimin parësor për të afruar në radhët e veta një sulmues të klasit botëror. Sipas burimeve pranë klubit, drejtuesit e katalanasve po analizojnë seriozisht mundësinë e heqjes dorë nga tre prej lojtarëve kyç të organikës: Gavi, Alejandro Balde dhe Frenkie de Jong. Drejtori sportiv i klubit, Deco, ka si synim të arkëtojë afërsisht 150 milionë euro nga ky operacion shitjesh, fond ky që do të përdorhet tërësisht për të mbuluar koston e një përforcimi madhor në vijën e parë të sulmit. Në tregun aktual, kartoni i Gavit llogaritet rreth 50 milionë euro, ai i mbrojtësit Alejandro Balde vlerësohet në 40 milionë euro, kurse mesfushori Frenkie de Jong kap shifrën e rreth 60 milionë eurove. Këto shifra, të marra së bashku, përmbushin saktësisht objektivin financiar të vendosur nga drejtuesit. Emri kryesor në listën e dëshirave për repartin ofensiv është ai i Harry Kane. Bomberi anglez i Bayern Munich mbetet profili i preferuar i shtabit drejtues për të udhëhequr sulmin në stadiumin “Camp Nou”. Megjithatë, lëvizjet e Barcelonës do të kushtëzohen nga vendimi i vetë lojtarit; nëse Kane zgjedh të zgjasë bashkëpunimin aktual me gjigantët bavarezë, kontrata e të cilëve skadon në qershor të vitit 2027, atëherë klubi spanjoll do të tërhiqet nga tentativa. Vlen të theksohet se gjatë merkatos së verës së shkuar, katalanasit bënë një përpjekje konkrete edhe për sulmuesin argjentinas të Atlético Madrid, Julián Álvarez, por operacioni nuk u finalizua për shkak të qëndrimit të prerë të klubit madrilen kundër shitjes së lojtarit.