Tragjedia në Vitomiricë / Halilaj i dalë në mbrojtje Gërvallës: Prokurorët dhe gjyqtarët e dështuar janë trashëgimi e 'klanit Pronto'

Pas ngjarjes së rëndë që tronditi opinionin publik me vrasjen e Arlinda Zekajt në Vitomiricë të Pejës, avokati Gazmend Halilaj ka reaguar hapur duke iu kundërvënë zërave që kërkojnë përgjegjësi politike nga ministrja e Drejtësisë, Donika Gërvalla. Përmes një video-mesazhi të publikuar në llogarinë e tij në rrjetin social Facebook, Halilaj ka argumentuar se ngecja dhe dështimet në sistemin e drejtësisë nuk burojnë nga ekzekutivi aktual. Sipas tij, hetuesit, prokurorët dhe gjyqtarët e paaftë janë mbetje të garniturave të kaluara qeverisëse, të cilat ai i ndërlidh me të ashtuquajturin “klani Pronto”. Lidhur me këtë, avokati u shpreh: “Hetuesit, prokurorët dhe gjyqtarët e dështuar nuk na i solli qeveria Kurti e as ministrja Donika Gërvalla, ata i gjetën në mesin tonë të sjellur nga klani Pronto. Paraprakisht të mbushur me diploma e tituj e me pasuri të cilën as vetë nuk e dinë kah e kanë”. Më tej, Halilaj ka hedhur kritika të ashpra ndaj pretendimeve për dorëheqje apo llogaridhënie nga drejtuesja e dikasterit të drejtësisë, duke e cilësuar këtë qasje si mungesë të qartë të leximit të realitetit. “Kërkimi i llogaridhënies dhe përgjegjësisë drejtuar ministres së Drejtësisë, tregon që kanë një konfuzion të madh mes fantazisë dhe realitetit. Shkoni kërkoni llogari tek ata që po i nxjerrin në rrugë. Kush po e kërkon drejtësinë, ata të mbushur me bomba deri dje!...”, deklaroi Halilaj gjatë reagimit të tij. Ky deklarim vjen në një kohë kur vrasja e Arlinda Zekajt ka nxitur revoltë të madhe qytetare, reagime me tonë të ashpra dhe protesta në vend, ku po kërkohet me ngulm zbardhja e plotë e krimit si dhe vënia para përgjegjësisë e zyrtarëve që mund të kenë dështuar në parandalimin e kësaj tragjedie.