Tragjedia në Bosnjë, Konjufca i shpreh ngushëllime Italisë për viktimat e aksidentit me helikopter

Kryediplomati i Kosovës, Glauk Konjufca, ka reaguar pas aksidentit tragjik ajror në Bosnjë dhe Hercegovinë, ku si pasojë e rrëzimit të një helikopteri të misionit EUFOR Althea, disa pjesëtarë të personelit italian kanë humbur jetën. Në mesazhin e tij të ngushëllimit, Konjufca i është drejtuar ministrit të Punëve të Jashtme të Italisë, Antonio Tajani, dhe ministrit të Mbrojtjes, Guido Crosetto, duke u shprehur solidaritetin e tij të thellë familjeve që janë prekur nga kjo humbje e rëndë. Gjithashtu, ai ka përcjellë urimet e tij për një shërim sa më të shpejtë të të gjithë personave që kanë pësuar lëndime gjatë këtij incidenti. “Republika e Kosovës vajton së bashku me Italinë. Nderojmë shërbimin e atyre që humbën jetën duke mbrojtur paqen dhe stabilitetin në rajonin tonë”, ka shkruar Konjufca në platformën X, duke vlerësuar kontributin e viktimave në misionet paqeruajtëse.