Alarm për sigurinë: Mbi 2 mijë raste të dhunës në familje brenda 9 muajve, gratë shënjestra kryesore

Dita e diel, 25 tetori, shënoi një moment tronditës për opinionin publik në vend, pas ngjarjes së rëndë në Vitomiricë të Pejës. Arlinda Zekaj humbi jetën në mënyrë tragjike, pasi u sulmua për vdekje me sopatë nga kunati i saj. Kjo vrasje e rëndë i shtohet një bilanci të zymtë, duke e çuar në tetë numrin e grave të vrara gjatë vitit 2026 nga persona të afërt, përfshirë partnerë, ish-partnerë apo anëtarë të familjes. Statistikat zyrtare të Policisë së Kosovës dëshmojnë se dhuna në familje mbetet një plagë e hapur për shoqërinë. Vetëm gjatë nëntë muajve të parë të këtij viti, në komisariate janë raportuar 2 mijë e 52 raste të dhunës, ku pjesa dërrmuese e viktimave, gjithsej 1 mijë e 626, janë gra. Duke analizuar trajtimin juridik të këtyre rasteve, juristi Anton Nrecaj thekson se raportimi i dhunës nuk është vetëm detyrë e viktimës, por një obligim ligjor për çdo qytetar që bëhet dëshmitar i një akti të tillë. Sipas tij, në momentin që një rast bëhet i ditur, organet e rendit janë të obliguara të ndërmarrin të gjitha veprimet e nevojshme procedurale. Nrecaj shton se, në rastet kur vlerësohet se niveli i rrezikshmërisë është i lartë, prokuroria duhet të bashkëpunojë ngushtë me policinë për të kryer bastisje dhe konfiskim të menjëhershëm të armëve. Kjo masë shihet si thelbësore për të parandaluar përshkallëzimin e dhunës në krime me pasoja fatale. Nga këndvështrimi sociologjik, sociologu Genx Xerxa identifikon disa faktorë kyç që nxisin këtë fenomen. Sipas tij, problemet me shëndetin mendor, përdorimi i substancave narkotike, si dhe vështirësitë socio-ekonomike janë shtytësit kryesorë të konflikteve. Për më tepër, Xerxa shpreh shqetësimin se zvarritja e proceseve gjyqësore po e humb besimin e qytetarëve te drejtësia, duke i shtyrë ata drejt vetëgjyqësisë. Kujtojmë se trendi i dhunës në familje ka qenë shqetësues edhe vitin e kaluar. Gjatë vitit 2025, në vend janë evidentuar 2 mijë e 711 raste, ku 1 mijë e 931 prej viktimave ishin të gjinisë femërore.