Zbardhet misteri në Itali: 31-vjeçari shqiptar u vra për një borxh droge, autori rrëfen krimin

Një ngjarje e rëndë ka tronditur komunitetin shqiptar në Itali, pas gjetjes së trupit të pajetë të 31-vjeçarit Denaldo Maxhallaku. Viktima, me profesion bojaxhi dhe banues në Gatteo, u zbulua i hedhur në një pus rreth 10 metra të thellë në zonën e Felloniches, në komunën e Longianos, pranë Cesenas. Autoritetet italiane kanë vënë në pranga një 29-vjeçar nga zona e Cesenas, i cili ka pranuar autorësinë e krimit përpara hetuesve. Sipas dëshmisë së dhënë, motivi i vrasjes dyshohet të jetë një borxh prej 1.000 eurosh, i lidhur me trafikun e kokainës. Trupi i të ndjerit u gjet mëngjesin e 28 tetorit, pas një kërkimi intensiv që zgjati disa javë. Denaldo Maxhallaku ishte raportuar si i zhdukur që prej datës 7 tetor. Vetëm një ditë më pas, automjeti i tij ishte gjetur i djegur plotësisht, rreth pesë kilometra larg vendit ku më vonë u zbulua trupi. Hetimet tregojnë se mbrëmjen e zhdukjes, viktima kishte lënë një takim me të dyshuarin për të zgjidhur çështjen e borxhit, por takimi degradoi në një përplasje fatale. Sipas rindërtimit të ngjarjes nga prokuroria, 29-vjeçari dyshohet se ka ekzekutuar shqiptarin me armë zjarri, përpara se ta hidhte trupin në pusin pranë banesës së tij dhe të shkatërronte mjetin e viktimës për të fshehur gjurmët. Karabinierët kanë sekuestruar dy gëzhoja pranë vendit të krimit, ndërsa operacioni për nxjerrjen e trupit u krye nga forcat zjarrfikëse dhe ekspertët kriminalistikë nën mbikëqyrjen e mjekut ligjor dhe Prokurorisë së Forlì-t. Denaldo Maxhallaku ishte baba i një vajze të mitur, vetëm një vjeçe, dhe kishte lënë pas edhe partneren e tij. Ndërkohë, autori i dyshuar ndodhet në paraburgim, duke u përballur me akuzat për vrasje dhe fshehje të kufomës, ndërsa procesi hetimor vazhdon për të dokumentuar plotësisht dinamikën e kësaj ngjarjeje tragjike.