Putin dërgon mesazh për kontinentin evropian: Jemi të përgatitur, por konflikti do të ishte fatal për të gjithë

Presidenti rus, Vladimir Putin, ka deklaruar se Rusia mbetet e gatshme për çdo skenar ushtarak, ndonëse theksoi se Moska nuk ka si synim nxitjen e një përplasjeje të drejtpërdrejtë me shtetet evropiane. Sipas tij, një përshkallëzim i mundshëm i situatës do të rezultonte në një bilanc tragjik ku nuk do të kishte asnjë palë fituese. Duke iu referuar debateve të fundit në kryeqytetet evropiane lidhur me fuqizimin e kapaciteteve mbrojtëse dhe parashikimet për një rrezik lufte deri në vitin 2030, kreu i Kremlinit u shpreh se Rusia nuk është ajo që po kërkon konfliktin. Megjithatë, ai e la derën hapur për rivalët e tij, duke shtuar: “Së pari, ne jemi plotësisht të gatshëm, por nuk dëshirojmë luftë me Evropën. Nëse ata kanë dëshirë të përgatiten, le ta bëjnë këtë”. Në fjalën e tij, 74-vjeçari paralajmëroi se pasojat e një përkeqësimi të mëtejshëm të marrëdhënieve do të ishin shkatërrimtare për të gjithë aktorët e përfshirë. “Nëse situata del jashtë kontrollit, nuk do të ketë fitues. Askush nuk duhet ta harrojë këtë fakt”, nënvizoi ai. Këto deklarata vijnë në një periudhë kur tensionet gjeopolitike janë rritur ndjeshëm, duke shtyrë vendet evropiane që të rishikojnë strategjitë e tyre të sigurisë dhe të investojnë më shumë në gatishmërinë ushtarake përballë kërcënimeve nga Rusia.