Pakënaqësi e thellë pas emërimit të prokurores së rastit 'Pajazitaj' në krye të Prokurorisë së Pejës

Emërimi i Valbona Disha-Haxhosajt në pozitën e ushtrueses së detyrës së Kryeprokurorit të Pejës ka nxitur reagime të ashpra nga familja e të ndjerës Donjeta Pajazitaj. Shkëlqim Pajazitaj, vëllai i viktimës, ka shprehur revoltën e tij, duke e konsideruar këtë vendim si një goditje për drejtësinë, pasi rasti i motrës së tij mbetet pa epilog përfundimtar edhe pas 11 vjetësh. Në një reagim publik, Shkëlqim Pajazitaj ka vënë në dyshim integritetin e këtij procesi emërimi, duke kërkuar llogaridhënie nga institucionet për trajtimin e çështjes së motrës së tij. Ai u shpreh se ky veprim i institucioneve të drejtësisë vetëm sa po shton mosbesimin e familjes ndaj sistemit gjyqësor në vend. “Në vend që të bëhet thirrje për drejtësi, ky vendim po e thellon edhe më shumë mosbesimin tim ndaj sistemit të drejtësisë!”, ka deklaruar ai. Pajazitaj ka drejtuar pyetje të hapura ndaj përgjegjësve, duke kërkuar të dijë se kush do të mbajë përgjegjësi për zvarritjen e këtij rasti dhe mënyrën se si është menaxhuar hetimi ndër vite. Familja Pajazitaj ka kërkuar transparencë të plotë dhe sqarime konkrete nga instancat përkatëse, duke insistuar se kanë të drejtë të dinë të vërtetën për vrasjen e Donjetës. Përkundër viteve të gjata të proceseve gjyqësore, rasti vazhdon të mbetet i hapur në aspektin e zbardhjes së autorësisë. Valbona Disha-Haxhosaj, e cila tashmë është emëruar në krye të Prokurorisë së Pejës, ishte prokurorja që në qershor të vitit 2017 kishte ngritur aktakuzën kundër Naser Pajazitajt, duke e akuzuar atë për vrasjen e 24-vjeçares. Çështja pati një rrugëtim të gjatë gjyqësor me verdikte të kundërta, që varionin nga pafajësia deri te dënimi me burgim të përjetshëm. Megjithatë, në prill të vitit 2023, Gjykata Supreme mori vendimin përfundimtar për lirimin e Naser Pajazitajt nga akuza për vrasje, për shkak të mungesës së provave të mjaftueshme. Ky vendim e mbylli kapitullin gjyqësor për të akuzuarin, por jo edhe kërkesën e familjes për të zbardhur të vërtetën mbi fatin tragjik të Donjeta Pajazitajt.