Pakënaqësi ndaj qeverisë: Edhe GJKKO i kthen krahët ftesës së Ramës për pagat

Gjykata e Posaçme kundër Korrupsionit dhe Krimit të Organizuar (GJKKO) i është bashkuar listës së institucioneve të drejtësisë që kanë refuzuar ftesën e kryeministrit Edi Rama për një takim konsultativ lidhur me trajtimin financiar dhe pagat e gjyqtarëve. Më herët, të njëjtin qëndrim refuzues kanë mbajtur edhe Gjykata e Lartë, Unioni i Gjyqtarëve si dhe Shoqata e Prokurorëve, të cilët kanë hequr dorë nga marrja pjesë në këtë tryezë diskutimi. Në anën tjetër, Këshilli i Lartë i Prokurorisë (KLP) ende nuk ka një vendim përfundimtar, pasi po pret votën dhe qëndrimin e anëtarëve të tij për të konfirmuar apo jo praninë në takimin e propozuar nga ekzekutivi. Këto konsultime, të thirrura nga kreu i qeverisë, synojnë diskutimin e paketës që rregullon pagat e trupës gjyqësore dhe asaj prokuroriale në vend.