Teherani i qëndron dialogut pas refuzimit të planit nga Trump: Pa tregtinë tonë, askush nuk do të lundrojë

Autoritetet iraniane kanë theksuar se rruga e vetme për t'i dhënë fund tensionit me Shtetet e Bashkuara dhe Izraelin mbetet ajo diplomatike, kjo pasi Presidenti amerikan Donald Trump konfirmoi refuzimin e një iniciative iraniane që synonte zhbllokimin e Ngushticës së Hormuzit dhe ndalimin e armiqësive. Në një reagim të publikuar në rrjetet sociale, Ministri i Jashtëm iranian, Abbas Araqchi, u shpreh se pozicioni i vendit të tij mbetet i palëkundur, duke shtuar se çdo hap drejt rivendosjes së lundrimit në Hormuz lidhet ngushtë me plotësimin e kushteve të tyre. Ai vuri në dukje se vetëm përmes bisedimeve të mirëfillta palët mund të dalin nga kjo ngërç-situatë. Paketa e paqes ishte prezantuar javën e kaluar në Nju Jork gjatë punimeve të Asamblesë së Përgjithshme të OKB-së, ku Teherani bëri të ditur se propozimi i ishte përcjellë Uashingtonit përmes diplomacisë së Katarit. Megjithatë, gjatë një prononcimi për gazetarët në Shtëpinë e Bardhë të shtunën, Trump deklaroi se e kishte rrëzuar këtë ofertë, duke vlerësuar se kërkesa iraniane për marrëveshje buron nga dëshpërimi përballë humbjeve të mëdha ekonomike. Pavarësisht kësaj, kreu i Shtëpisë së Bardhë la të kuptohet se kanalet e komunikimit mbeten ende funksionale, duke deklaruar të dielën në një intervistë telefonike për portalin Axios se pret që diplomatët amerikanë të vijojnë kontaktet gjatë kësaj jave. Nga ana e tij, kryediplomati Araqchi bëri të ditur se ndërmjetësuesit rajonalë ende nuk e kishin zyrtarizuar pranë tyre refuzimin amerikan të planit. Ai theksoi se po pritet qëndrimi përfundimtar i përcjellë nga ndërmjetësit, mbi të cilin do të bazohen hapat e mëtejshëm të udhëheqjes iraniane. Shtetet e Bashkuara kanë vënë në zbatim sanksione të rënda ekonomike ndaj Iranit me qëllim ndalimin e sulmeve ndaj anijeve tregtare në Ngushticën e Hormuzit. Kjo bllokadë ka sjellë një rënie drastike të qarkullimit detar në zonë, pavarësisht pretendimeve të përsëritura të Trump se Uashingtoni ushtron kontroll të plotë mbi këtë korridor detar. Ndërkohë, komandanti i përgjithshëm i ushtrisë iraniane, Amir Hatam, e cilësoi momentin aktual si një fazë vendimtare dhe kritike të përplasjes, duke paralajmëruar se Teherani nuk do të lejojë një skenar ku ekonomia dhe tregtia e tij bllokohen, ndërkohë që fuqitë e huaja shfrytëzojnë lirisht arteriet strategjike të rajonit. "Nëse Irani nuk mund të tregtojë, nëse Irani nuk mund të mbijetojë, askush nuk do të jetë në gjendje të tregtojë ose të mbijetojë", deklaroi ai, në një mesazh të transmetuar përmes mediave shtetërore iraniane.