“Edhe nëse më vrasin, do të japin llogari”: Zbardhet biseda rrëqethëse e Arlinda Zekajt para tragjedisë

Emisioni hulumtues “MAT” ka sjellë në vëmendje një tjetër komunikim audio të Arlinda Zekajt me motrën e saj, ku e ndjera shpreh hapur frikën për jetën e saj dhe ankthin për fatin e djalit të saj, pak para se të ndodhte ngjarja e rëndë. Në audio-incizimin e bërë publik, Arlinda dëgjohet duke shpjeguar se po e pengonin të hynte në banesën e saj dhe se nuk kishte asnjë informacion se ku ndodhej fëmija. Ajo shpreh vendosmërinë për të kërkuar sërish ndërhyrjen e organeve të rendit nëse tensionet do të vazhdonin. “Motër, nëse më gjen diçka, se unë nuk dal prej shtëpisë me ditë që rrotullohet krejt dynjaja,” dëgjohet të thotë ajo në bisedë, duke theksuar se kishte frikë për sigurinë e saj fizike. Më tej, ajo shpreh shqetësimin e thellë për vendndodhjen e djalit, duke këmbëngulur se fëmija duhet të qëndronte pranë saj dhe se nuk do të lejonte që ai të mbahej larg saj. Ajo përmend gjithashtu se do të telefononte menjëherë numrin e emergjencës 192 në rast të ndonjë afroje apo rreziku të mundshëm. Në mbyllje të këtij komunikimi prekës, Arlinda ngre alarmin për pamundësinë e hyrjes në shtëpi dhe lë një porosi të qartë për familjarët e saj, duke paralajmëruar se përgjegjësia për çdo gjë që mund t'i ndodhte do të binte mbi personat e tjerë të përfshirë në konflikt: “Edhe nëse më mbytin, këta do të japin përgjegjësi”.