Bledi Shkëmbi pas kualifikimit në çerekfinale: Fitore e merituar dhe hapësirë për talentët e rinj

Struga Trim Lum ka prerë biletën për në fazën çerekfinale të Kupës së Maqedonisë së Veriut, pasi ka triumfuar me rezultatin e pastër 2:0 ndaj skuadrës së Bellasicës. Pas përfundimit të sfidës, kryetrajneri Bledi Shkëmbi ka shprehur plotësisht entuziazmin e tij për kalimin më tej mes tetë ekipeve më të mirë të turneut, duke vënë theksin te paraqitja pozitive e lojtarëve që deri më tani kishin pasur më pak hapësira në fushë. “Natyrisht, jemi të kënaqur me kualifikimin. Për këtë ndeshje vendosëm t’u jepnim mundësi futbollistëve që gjatë kësaj jave kishin pasur më pak minuta lojë. Mendoj se kjo ndeshje ishte shumë e dobishme për ne edhe në këtë aspekt. Besoj se futbollistët e rinj luajtën mirë dhe se, në fund, u kualifikuam me meritë në çerekfinale”, u shpreh strategu i skuadrës strugane.