Seanca e nesërme e Kuvendit: Gjashtë pika kyçe në fokus, buxheti dhe Byroja e pasurisë në rend dite

Kuvendi i Kosovës do të mblidhet nesër në seancën e radhës plenare, e cila është parashikuar të nisë në orën 10:00. Sipas njoftimit zyrtar për media, agjenda e punës përfshin gjithsej gjashtë çështje për shqyrtim. Ndër temat më të rëndësishme që pritet të diskutohen janë ndryshimet në Ligjin për ndarjet buxhetore, si dhe Projektligji për Byronë Shtetërore për Verifikimin dhe Konfiskimin e Pasurisë së Pajustifikueshme. Seanca do të hapet me miratimin e procesverbaleve nga mbledhjet e mëparshme, për të vazhduar më pas me deklarimet e deputetëve jashtë rendit të ditës dhe pyetjet parlamentare. Më tej, ligjvënësit do të shqyrtojnë në lexim të dytë Projektligjin për ndryshimin dhe plotësimin e Ligjit për ndarjet buxhetore për Buxhetin e Republikës së Kosovës për vitin 2026, si dhe në lexim të dytë Projektligjin për Byronë Shtetërore për Verifikimin dhe Konfiskimin e Pasurisë së Pajustifikueshme. Në fund të rendit të ditës është parashikuar edhe votimi i propozimit të paraqitur nga Grupi Parlamentar i Listës Serbe, i cili ka të bëjë me emërimin e deputetëve në komisionet parlamentare.