Sveçla takon zyrtarin e lartë të KE-së: Kosova po shënon hapa para në siguri dhe migrim

Ministri i Punëve të Brendshme, Xhelal Sveçla, ka zhvilluar sot një takim pune me Olivier Onidi, Zëvendësdrejtor i Përgjithshëm në Drejtorinë e Përgjithshme për Migracionin dhe Çështjet e Brendshme (DG HOME) të Komisionit Evropian, i cili shërben edhe si Koordinator për Zonën Schengen. Në qendër të bisedës mes dy zyrtarëve ka qenë partneriteti mes dicasterit të brendshëm dhe DG HOME, hapat e arritur nga Kosova në rrugën e integrimit evropian, si dhe thellimi i reformave në sektorët e menaxhimit të kufijve, azilit, migrimit dhe sigurisë publike. Gjatë këtij takimi, ministri Sveçla ka falënderuar përfaqësuesin e Komisionit Evropian për ndihmën e pandërprerë në ngritjen e kapaciteteve shtetërore dhe harmonizimin e kuadrit ligjor vendor me standardet e Bashkimit Evropian. Ai veçoi gjithashtu rëndësinë e nisjes së zbatimit të nismave të reja përmes fondeve të IPA-s, pas ratifikimit të marrëveshjeve përkatëse financiare në Kuvendin e Republikës së Kosovës.