Maura Higgins shkëlqen në ritmet e horrorit, transformohet në vampir në “Dancing With the Stars”

Ish-konkurrentja e njohur e “Love Island”, Maura Higgins, ka habitur publikun me paraqitjen e saj të guximshme, duke u shndërruar në një vampir të vërtetë gjatë mbrëmjes së filmave horror në spektaklin e famshëm të kërcimit “Dancing With the Stars”, të mbajtur të martën. Ajo ngjiti në skenë një numër vallëzimi bashkëkohor jashtëzakonisht energjik, i cili erdhi si një frymëzim nga filmi kult “The Lost Boys”, ndërsa në këtë udhëtim artistik ajo u shoqërua nga partneri i saj profesionist, Mark Ballas. Maura arriti të rrëmbejë gjithë vëmendjen e audiencës me një fustan të bardhë të përgjakur artificialisht, lente sysh me nuancë të bardha që i jepnin një pamje rrëqethëse, si dhe me flokët e saj brune të lëshuara në një stil të lagur. Për ta sjellë sa më origjinale atmosferën e zymtë, ajo gjatë performancës simuloi edhe kafshimin e partnerit në qafë, duke e mbyllur mbrëmjen në mënyrën më dramatike të mundshme. Kjo mbrëmje erdhi me sfida shtesë për Maura Higgins, e cila u gjend nën një presion të dukshëm pasi në panelin e jurisë po ukej edhe Shirley Ballas, nëna 66-vjeçare e partnerit të saj, Mark Ballas. Megjithatë, Shirley ruajti profesionalizmin dhe nuk bëri asnjë lloj favorizimi, duke e vlerësuar konkurrenten me pikët më të ulëta krahasuar me anëtarët e tjerë të trupës gjykuese. Gjatë kritikës së saj, jiuria vuri në dukje disa mangësi në lëvizjet e këmbëve të Maura-s, e cila kërceu zbathur, duke e këshilluar atë që të fokusohet më shumë te rrotullimi i shputave për të arritur një fluiditet më të madh në skenë. “Kur ta arrish këtë, gjithçka do të fillojë të rrjedhë”, deklaroi ajo, ndërkohë që nga ana tjetër nuk i kurseu lëvdatat për ndryshimet dinamike, ngritjet dhe qasjen e fuqishme drejt dyshemesë, duke vërejtur gjithashtu një përmirësim të dukshëm në lëvizjet e krahëve. Nga ana tjetër, pjesa tjetër e jurisë e përbërë nga Carrie Ann Inaba, Derek Hough dhe Bruno Tonioli e duartrokiti Maura-n për shkak të karizmës së saj skenike dhe magnetizmit që ajo përcjell te publiku. Bruno Tonioli u shpreh se ajo ka aftësinë unike për ta bërë çdo paraqitje të duket magjepsëse, ndërsa Derek Hough e cilësoi numrin si një ndërthurje perfekte mes elegancës, joshjes dhe elementeve të frikshme. Përfundimisht, Maura u shpërblye me shtatë pikë nga Shirley Ballas, kurse gjyqtarët e tjerë i dhuruan nga tetë dhe nëntë pikë, duke bërë që ajo të mbledhë në total 32 pikë. Pas mbylljes së kësaj sfide, ylli televiziv pranoi hapur se ky zhanër i ka përshtatur jashtëzakonisht shumë: “Çuditërisht, më pëlqeu shumë. Do të doja ta bënim këtë çdo javë!”, u shpreh ajo.