Sveçla takon zyrtarin e lartë të Komisionit Evropian, Olivier Onidi: Në fokus siguria, migracioni dhe agjenda e integrimit

Ministri i Punëve të Brendshme, Xhelal Sveçla, ka zhvilluar sot një takim zyrtar me Olivier Onidi, Zëvendësdrejtor i Përgjithshëm në Drejtorinë e Përgjithshme për Migracionin dhe Çështjet e Brendshme (DG HOME) të Komisionit Evropian, i cili shërben edhe si Koordinator për Zonën Schengen. Në qendër të bisedimeve mes palëve ishte partneriteti mes Ministrisë së Punëve të Brendshme dhe DG HOME, arritjet e Kosovës në procesin e integrimit evropian, si dhe intensifikimi i reformave thelbësore në sektorët e migrimit, mbrojtjes së kufijve, trajtimit të azilit dhe sigurisë publike. Gjatë këtij takimi, ministri Sveçla u shpreh mirënjohës për ndihmën e pandërprerë që DG HOME i ka dhënë institucioneve vendore në ngritjen e kapaciteteve dhe në harmonizimin e legjislacionit me standardet e Bashkimit Evropian. Me këtë rast, ai veçoi si shumë të rëndësishëm nisjen e zbatimit të nismave të reja përmes fondeve të IPA-s, pas ratifikimit të marrëveshjeve përkatëse financiare nga Kuvendi i Republikës së Kosovës.