Tirana kërkon kthesën në derbi, Klafuriç: Jemi të fokusuar te fitorja ndaj Dinamos

Pas disfatës zhgënjyese në “Klasiken” e futbollit shqiptar ndaj Vllaznisë në Shkodër, ku bardheblutë u mposhtën me rezultatin 0-2, Tirana është vënë në lëvizje për sfidën e radhës. Kryeqytetasit do të përballen nesër me Dinamon në kuadër të javës së 8-të të Superiores, një ndeshje që do të zhvillohet në stadiumin “Niko Dovana” të Durrësit, duke filluar nga ora 13:30. Në prag të këtij derbi, trajneri i Tiranës, Dean Klafuriç, ka theksuar nevojën për reagim të menjëhershëm. “Qasja jonë mbetet e njëjtë në çdo takim: ne luajmë për të fituar. Humbja e fundit na ka lënë një shije të hidhur, por mënyra e vetme për t’u këndellur është triumfi në sfidën e radhës. Çdo fitore ka peshën e saj, edhe pse shija e një suksesi në derbi është gjithmonë e veçantë”, deklaroi tekniku kroat. Klafuriç nuk la pa përmendur edhe vështirësitë e mungesës së një stadiumi fiks për ekipin e tij. Sipas tij, fakti që Tirana duhet të luajë larg shtëpisë dhe tifozëve është një disavantazh i qartë për një klub me përmasat e bardhebluve, pasi mungesa e fushës së njohur ndikon drejtpërdrejt në performancën dhe komoditetin e futbollistëve. Duke analizuar përballjen me shkodranët, trajneri u shpreh se ekipi nuk çedoi në krijimin e rasteve, por në finalizim. “E kemi vlerësuar me detaje atë ndeshje. Për sa i përket lojës, krijuam më shumë se kundërshtari, por nuk ditëm t’i konkretizonim mundësitë. Kjo është pika kryesore ku duhet të përmirësohemi: përballë Dinamos, efikasiteti para portës do të jetë çelësi për të marrë pikët e plota”, përfundoi Klafuriç.