Skema monstruoze e vëllezërve milionerë: 30 vite burg për manjatët që drogonin dhe përdhunonin gra

Tre vëllezër, mes të cilëve dy manjatë të njohur të tregut të pasurive të paluajtshme, janë dënuar me nga 30 vjet heqje lirie secili, pasi u gjetën fajtorë për një rrjet kriminal abuzimi seksual që ka zgjatur për disa dekada, ku përfshiheshin drogimi dhe sulmet ndaj dhjetëra grave. Tal Alexander, 40 vjeç, së bashku me vëllezërit e tij binjakë, Oren dhe Alon Alexander, 39 vjeç, u shpallën fajtorë gjatë muajit mars. Ata akuzoheshin se shfrytëzonin pasurinë, ndikimin dhe statusin e tyre financiar për të tërhequr viktima në festa dhe banesa të shtrenjta, ku më pas i dhunonin seksualisht. “Veprimet tuaja ishin monstruoze. Krimet tuaja shkatërruan jetët e viktimave”, theksoi gjyqtarja Valerie Caproni gjatë shpalljes së vendimit në gjykatën federale të Nju Jorkut. Në seancën e zhvilluar të martën, 12 gra dolën para drejtësisë për të dhënë dëshmitë e tyre, përfshirë edhe një person që nuk kishte dëshmuar gjatë fazës paraprake të procesit. Ato sollën në vëmendje plagët e rënda psikologjike të lëna nga kjo dhunë, duke kërkuar që turpi i mbajtur për vite të rëndojë tashmë mbi supet e autorëve, ndërkohë që shumë prej tyre kërkonin burgim të përjetshëm. Maya Miller rrëfeu se, pasi u bë objekt i përdhunimit nga Tal Alexander në vitin 2014, humbi çdo ndjenjë të sigurisë personale. “Brenda vetes mbaj një funeral të heshtur për personin që mund të isha bërë nëse kjo nuk do të më kishte ndodhur kurrë”, u shpreh ajo në sallën e gjyqit. Një tjetër viktimë, e cila foli nën pseudonimin Isa Brooks, tregoi se u përdhunua nga Tal dhe Alon Alexander kur ishte vetëm 16 vjeçe, çka i hoqi mundësinë për t'i besuar më vetvetes. “Nuk e kisha idenë se në çfarë rreziku ndodhesha, derisa ishte tepër vonë”, tha ajo. Po ashtu, një tjetër grua bëri me dije se kur kishte menduar të denonconte ngjarjen, Tal Alexander e kishte kanosur drejtpërdrejt, duke i kujtuar se ku punonte motra e saj. Prokurorja Elizabeth Espinosa kërkoi ndëshkimin maksimal për të tre të pandehurit, duke argumentuar se provat dëshmojnë qartë shkallën e lartë të dëmit të shkaktuar ndër vite. “Për vite me radhë, ata përsosën mënyrat për të joshur gratë me premtimin e luksit”, u shpreh ajo, duke shtuar se vëllezërit nuk shfaqën asnjë shenjë pendese apo shqetësimi për vuajtjet e shkaktuara. Gjatë rrëfimeve prekëse të viktimave, tre vëllezërit ruajtën një qëndrim të ftohtë, duke shfaqur pak emocione dhe duke komunikuar herë pas here me avokatët e tyre. Ekipi mbrojtës deklaroi se u kishte sugjeruar klientëve të mos i shikonin gratë në sy për të shmangur keqkuptimet e mundshme të qëndrimit të tyre. Avokatët kërkuan një dënim prej 15 vitesh burg, duke argumentuar se të pandehurit janë shndërruar në prindër të përkushtuar dhe se mungesa e tyre do të sillte pasoja për familjet e tyre. Megjithatë, gjatë fjalës së tyre përfundimtare, të tre vëllezërit vazhduan të këmbëngulin në pafajësinë e tyre. Tal Alexander pranoi se ka pasur një filozofi jetësore të bazuar te motoja “puno shumë, argëtohu shumë”, ndërsa shtoi se tashmë e kupton që veprimet e tij kishin “lënduar ndjenjat e njerëzve”. Pavarësisht këtyre pafajësive të deklaruara, gjyqtarja Caproni mbeti e palëkundur, duke kritikuar ashpër mungesën e pendesës. “Si mund të rehabilitohet dikush që nuk i ka pranuar kurrë gabimet që ka bërë?”, pyeti ajo retorikisht. Në fund të seancës, gjykata vendosi t'i dënojë secilin prej tyre me nga 30 vite burg për akuzat kryesore dhe me nga 20 vite të tjera për vepra penale shtesë. Këto dënime do të shlyhen paralelisht, duke bërë që koha totale e vuajtjes së dënimit efektiv të jetë 30 vjet. Si funksiononte skema e abuzimit? Gjatë procesit pesëjavor, 11 gra dëshmuan se vëllezërit përdornin dhurata të kushtueshme dhe udhëtime drejt vendeve ekskluzive, përfshirë Aspen dhe Bahamas, për t'i joshur ato. Sipas hetimeve dhe provave të siguruara nga prokuroria, skema mbështetej te manipulimi përmes statusit të lartë social dhe pasurisë.