Valë goditëse e Antiterrorit: Një i arrestuar, 17 të proceduar dhe 8 profile online nën lupë për nxitje dhune gjatë protestave

Drejtoria e Antiterrorit ka ndërmarrë një aksion të gjerë, duke vënë në pranga një person dhe duke nisur procedimin penal për 17 të tjerë. Ndërkohë, autoritetet kanë referuar në Prokurori edhe tetë raste të reja për identifikimin e autorëve që fshihen pas thirrjeve dhe nxitjes së paligjshmërisë në rrjetet sociale, në kuadër të protestave të organizuara gjatë dy javëve të fundit. Sipas burimeve zyrtare të Policisë, operacioni është zhvilluar nga njësitë e Antiterrorit në bashkëngjitje me Sektorin e Hetimit të Krimit Kibernetik dhe prokuroritë e juridiksionit të përgjithshëm. Hetimet janë fokusuar te postimet me përmbajtje të dyshimtë, kërcënuese dhe të dhunshme në rrjetet sociale, të publikuara gjatë tubimeve të zhvilluara në kryeqytet dhe në disa qarqe të vendit që nga data 13 tetor 2026. Në pranga ka rënë shtetasi E. Xh., 33 vjeç, banues në Tiranë, i cili akuzohet për veprën penale “Përhapja e informacioneve të rreme që ngjallin panik”. Ai dyshohet se i ka dërguar një mesazh kërcënues në platformën Facebook një subjekti privat, ku paralajmëronte vendosjen e lëndëve plasëse në tri godina të ndryshme të tij. Ndërkohë, materialet hetimore për shtetasin A. K., 34 vjeç, janë përcjellë në Prokurori pasi dyshohet se ka bërë thirrje publike për akte dhune përmes rrjetit social Instagram. Po ashtu, Policia pretendon se ai ka hapur një llogari në platformën GoFundMe për të mbledhur fonde, duke gënjyer qytetarët se i rrezikohej jeta. Gjatë kontrollit fizik, atij iu sekuestrua si provë materiale një dokument identifikimi si gazetar, i cili sipas autoriteteve përdorej për t'i shmangur kontrollit dhe shoqërimit nga efektivët e policisë. Në lupën e drejtësisë ka rënë edhe shtetasi E. N., 51 vjeç, nga Shëngjini, i cili akuzohet për “Thirrje publike për veprime të dhunshme” dhe “Thirrja për urrejtje nacionale”. Sipas Policisë, ai ka shpërndarë video në rrjetet sociale ku premtonte shuma parash në këmbim të akteve të dhunshme ndaj deputetëve të Kuvendit dhe anëtarëve të Këshillit të Ministrave. Një tjetër dosje i takon shtetasit G. P., 37 vjeç, i dyshuar për veprat penale “Ndërhyrje të padrejta në jetën private” dhe “Përndjekja”. Sipas autoriteteve, ai ka publikuar në mënyrë të përsëritur të dhëna personale, fotografi dhe pamje filmike të punonjësve të Policisë së Shtetit, të shoqëruara me komente fyese dhe akuzuese. Policia thekson se këto veprime kanë rrezikuar jetën e efektivëve dhe familjeve të tyre, duke nxitur gjithashtu intimidim dhe dhunë, ndërsa në profilin e tij janë konstatuar edhe paralajmërime ndaj institucioneve shtetërore. Për akuzat e “Thirrjeve publike për veprime të dhunshme” dhe “Nxitjes së urrejtjeve dhe e grindjeve”, procedimi është shtrirë edhe ndaj shtetasit A. G., 56 vjeç, nga Tirana, i cili dyshohet se ka shpërndarë foto dhe shkrime nxitëse për dhunë gjatë protestave. Po kështu, A. A., 50 vjeç, banues në Tiranë, po hetohet për “Shpërndarjen e shkrimeve antikushtetuese” dhe “Thirrjet publike për veprime të dhunshme”, pas një postimi të bërë në Facebook. Në listën e personave nën hetim është futur edhe 20-vjeçari O. M. nga Tirana, i cili akuzohet për “Organizimi dhe pjesëmarrja në grumbullime e manifestime të paligjshme” dhe “Shpërndarja e shkrimeve antikushtetuese”, pas verifikimeve të kryera nga strukturat e rendit.