Valë pakënaqësie në Kinë ndaj Kylian Mbappé, tifozët revoltohen dhe djegin fanellat e sulmuesit

Tensionet mes Kylian Mbappés dhe opinionit publik në Kinë kanë marrë përmasa të reja, pas deklaratave të yllit francez rreth Mao Ce Dunit, të cilin ai e përmendi tërthorazi teksa diskutonte për memet në rrjetet sociale ku fytyra e tij ishte vendosur mbi trupin e ish-liderit kinez. Reagimet nuk janë kufizuar vetëm në masat institucionale, pasi autoritetet kineze kanë ndërmarrë tashmë hapin për të bllokuar transmetimin e ndeshjeve të Real Madridit në kanalet shtetërore. Në hapësirën digjitale qarkullojnë pamje të bujshme ku mbështetës kinezë shfaqen duke shkatërruar simbolet që lidhen me futbollistin. Në një nga sekuencat e publikuara, një simpatizant shfaqet duke shkelur me këmbë postera me portretin e sulmuesit, ndërkohë që manifeston hapur zhgënjimin e tij të thellë për fjalët e përdorura nga sportisti. “Më zemëron shumë ajo që kam dëgjuar të thotë Mbappé për Kinën. I shpall bojkot të plotë dhe nuk do ta fal kurrë”, shprehet tifozi në video. Në vazhdim të këtij revolti, i njëjti person përdor një çakmak për t'i vënë flakën një fanelle të Mbappés – kësaj radhe fanellës zyrtare të Kombëtares së Francës, dhe jo asaj të klubit të tij aktual, Real Madrid.