Kriza te Juventusi, ish-sulmuesi Borriello: As Antonio Conte nuk mjafton për majat, klubit i mungon Andrea Agnelli

Ish-sulmuesi i njohur i Juventusit, Marco Borriello, ka bërë një analizë të thellë rreth situatës aktuale të bardhezinjve, duke nënvizuar se vështirësitë e skuadrës nuk mund t'i faturohen vetëm stafit teknik. Gjatë një interviste për mediat italiane, ai ka theksuar se një rikthim i mundshëm i Antonio Contes nuk do të ishte i mjaftueshëm për ta shndërruar sërish Juventusin në një skuadër dominuese, ndërkohë që ka drejtuar vëmendjen te mungesa e ish-presidentit Andrea Agnelli. Borriello, i cili ka shijuar triumfin në Serie A me fanellën e “Zonjës së Vjetër”, shprehu konsideratë maksimale për Conten, por insiston se problemet e klubit janë shumë më të rrënjosura. “Jam një admirues i madh i Antonios. Ai është fitues dhe e kam përjetuar personalisht forcën e tij. U jep lojtarëve një mentalitet të jashtëzakonshëm”, deklaroi Borriello. Pavarësisht kësaj, ish-lojtari nuk mendon se Luciano Spalletti është burimi i kriseve aktuale në Torino, duke hequr çdo faj nga trajneri i tanishëm. “Nuk besoj se Spalletti është problemi i Juventusit, prandaj nuk mendoj se vetëm Conte do mjaftonte për ta kthyer klubin në mesin e më të mirëve”, u shpreh ai. “Po flasim për dy trajnerë të jashtëzakonshëm. Luciano dhe Antonio janë të ndryshëm, por të dy janë fenomenalë në aspektin taktik dhe teknik. Conte do ta rikthente ADN-në e Juventusit dhe do të punonte si i çmendur, por nuk jam i bindur se vetëm kjo do të mjaftonte për të fituar.” Në pyetjen se çfarë i mungon saktësisht strukturës aktuale të klubit, Borriello dha një përgjigje pa hezitim: “Një president si Andrea Agnelli.” Sipas tij, ish-numri një i klubit shquhej për praninë e tij konstante pranë skuadrës, duke ndërtuar një urë të fortë lidhëse mes drejtuesve, vetë futbollistëve dhe tifozëve. “Nga jashtë mund të ndihet mungesa e afërsisë së Andreas. Ai ishte një drejtues gjithmonë i pranishëm”, shtoi ish-sulmuesi. Nga ana tjetër, ai vlerësoi lart angazhimin e familjes pronare, duke veçuar kontributin e John Elkannit. “Juventusi ka pronarë historikë dhe unikë. Lidhja e tyre me xhevahirin e familjes është e qartë, edhe në aspektin financiar. John Elkann është tifozi më i madh i klubit dhe duhet falënderuar për investimet e vazhdueshme. Nuk mund t’i kërkosh më shumë.” Megjithatë, Borriello pranoi se agjenda e ngarkuar e Elkannit në botën e biznesit nuk i lejon atij praninë e përditshme në ambientet e klubit. “Ai është një biznesmen shumë i rëndësishëm dhe nuk mund të jetë çdo ditë në qendrën stërvitore.” Sipas vlerësimit të tij, sukseset e mëdha në kohën e Contes nuk ishin vetëm meritë e talentit në fushë apo e taktikës, por e një atmosfere të veçantë bashkimi. “Juventusit i mungon ajo magji që bën gjithçka të përputhet. Është magjia që ekzistonte në sezonin kur fituam titullin me Conten, tifozët dhe stadiumin e ri”, u shpreh ai. “Këto nuk janë legjenda urbane. Lojtarët e ndiejnë atmosferën dhe, edhe në mënyrë të pavetëdijshme, sillen në përputhje me to.” Për ta ilustruar këtë ndryshim të qasjes psikologjike, Borriello përmendi edhe reagimet e lojtarëve aktualë, si në rastin e mbrojtësit Gleison Bremer pas humbjes kundër Lazios, duke nënvizuar se standardet dikur ishin krejtësisht ndryshe.