Tragjedia e Arlinda Zekajt: Monitorimi i rrjeteve sociale tregon se 70% e qytetarëve kërkojnë largimin e ministres

Tragjedia e rëndë e vrasjes së Arlinda Zekajt ka shkaktuar një valë të fuqishme indinjate në opinionin publik, ku rrjetet sociale janë shndërruar në një arenë thirrjesh të pandërprera për llogaridhënie. Sipas një analiza të kryer me anë të inteligjencës artificiale të platformës META, e cila ka monitoruar rreth 4.620 komente publike të bëra gjatë datave 26 dhe 27 tetor, rezulton se 70 për qind e reagimeve të klasifikuara kërkojnë hapur dorëheqjen e Donika Gërvallës nga pozita e Ministres së Drejtësisë. Në të njëjtën kohë, shifrat tregojnë se vetëm 20 për qind e komentuesve kanë dalë në mbrojtje të ministres apo të ekzekutivit, ndërsa 10 për qind e tyre kanë preferuar ta shtrijnë përgjegjësinë te i gjithë sistemi shtetëror. Ky reagim masiv erdhi si pasojë e drejtpërdrejtë e deklaratës së dhënë nga Gërvalla më 26 tetor, gjatë seancës së jashtëzakonshme të Kuvendit të Kosovës, ku ajo u shpreh se viktima nuk i ishte drejtuar Qeverisë, duke bërë kështu një ndarje mes saj dhe institucioneve të drejtësisë. Kjo deklaratë u interpretua gjerësisht nga qytetarët si një tentativë për të fajësuar vetë gruan që kishte kërkuar ndihmë paraprakisht, por që nuk gjeti mbrojtjen e duhur. Si kundërpërgjigje ndaj pakënaqësisë së madhe, ministrja bllokoi opsionin e komenteve në postimet e saj në rrjetet sociale, por kjo vetëm sa e shtoi zemërimin e publikut. Shprehje si “Arlinda e bëri atë që duhej, ti jo” dhe thirrjet e përsëritura “Dorëhiqu Donika, s’ke moral me fol” dominuan hapësirën digjitale, ndërsa përdoruesit theksonin se përgjegjësia nuk është partiake, por njerëzore dhe morale. Pjesa e komentuesve që përbën 20 për qindëshin e reagimeve u mundua ta vendosë ngjarjen në një kontekst më të gjerë institucional, duke përmendur përgjegjësinë e prokurorëve, policëve dhe gjyqtarëve, ose duke i cilësuar sulmet ndaj ministres si lëvizje me prapavijë politike. Ndërkaq, 10 për qind e reagimeve u fokusuan te mangësitë rrënjësore të sistemit, duke përfshirë urdhrat e mbrojtjes, funksionimin e strehimoreve dhe zbatimin e dobët të ligjit kundër dhunës. Kujtojmë se pak ditë para se të vritej dyshohet nga kunati i saj, e ndjera Arlinda Zekaj kishte alarmuar autoritetet në Pejë se jeta e saj ndodhej në rrezik serioz, por kërkesat e saj dështuan t'i sigurojnë mbrojtjen e munguar. Përballë këtij dështimi institucional dhe indinjatës së grumbulluar, Kolektivi për Mendim dhe Veprim Feminist ka thirrur një protestë për sot, më 28 tetor, duke filluar nga ora 16:00 tek sheshi “Zahir Pajaziti” në Prishtinë, për të kërkuar drejtësi dhe llogaridhënie përgjatë një marshimi drejt Ministrisë së Drejtësisë, organeve të rendit dhe Qeverisë.