Vendimi zyrtar i FFK-së: Ballkani merr tri pikët në tavolinë ndaj Vushtrrisë

Komisioni i Garave pranë Federatës së Futbollit të Kosovës ka marrë vendimin përfundimtar lidhur me sfidën e pažhvilluar ndërmjet Vushtrrisë dhe Ballkanit. Kjo përballje i është atribuar skuadrës nga Theranda me rezultat zyrtar 3:0. Ky epilog erdhi pasi ndeshja e paraparë për fundjavën e kaluar dështoi të luhej, si pasojë e bojkotit nga ana e futbollistëve vushtrrias, të cilët refuzuan të paraqiten në fushën e blertë. Dueli ishte planifikuar të zhvillohej në stadiumin “Zahir Pajaziti” në qytetin e Podujevës, mirëpo u anulua përfundimisht për shkak të mungesës së skuadrës vendase. Në arsyetimin e publikuar nga institucioni i futbollit thuhet: “Duke pasur parasysh gjendjen faktike të konstatuar dhe detyrimin për zbatimin e rregullave që përcaktojnë zhvillimin e rregullt të garave, Komisioni ka vlerësuar se ekzistojnë kushtet për regjistrimin e ndeshjes me rezultat zyrtar”. Pas përmbylljes së javës së 11-të, ekipi i Ballkani pozicionohet në vendin e gjashtë të renditjes tabelare me 16 pikë të tubuara, ndërkaq Vushtrria vazhdon të mbetet në zonën e rrezikut, duke mbajtur vendin e fundit me vetëm tri pikë në llogarinë e saj.