Kriza politike në Izrael, presidenti Herzog u bën thirrje partive për kompromis me synim shmangien e zgjedhjeve të reja

Presidenti i Izraelit, Isaac Herzog, u ka bërë thirrje forcave politike në vend që të tregojnë fleksibilitet maksimal dhe të bëjnë çdo përpjekje për të parandaluar një cikël të ri zgjedhor. Këto janë deklaratat e para publike të kreut të shtetit pas procesit zgjedhor të një ditë më parë, i cili la pas një skenar të paqartë ku asnjëri prej blloqeve nuk siguroi shumicën e nevojshme për të krijuar qeverinë. Duke folur nga Rezidenca Presidenciale në Jerusalem, presidenti Herzog theksoi rëndësinë e gjetjes së një gjuhe të përbashkët. “Ne duhet të bëjmë gjithçka që mundemi, sidomos pas zhvillimeve të djeshme, për të shmangur një raund tjetër zgjedhjesh. Për këtë arsye, pres që të gjithë përfaqësuesit që vijnë këtu të jenë të hapur për dialog dhe marrëveshje”, u shpreh ai. Sipas agjendës presidenciale, rezultatet zyrtare të votimeve pritet t'i dorëzohen Herzogut javën e ardhshme nga gjyqtari i Gjykatës së Lartë, Noam Sohlberg. Menjëherë pas këtij hapi zyrtar, kreu i shtetit do të nisë rundin e konsultimeve me secilën prej fraksioneve të përfaqësuara në Knesset për të shqyrtuar mundësitë e formimit të kabinetit të ri qeveritar. Në fjalën e tij, presidenti u ndal edhe te shifrat e pjesëmarrjes, duke i cilësuar ato si jashtëzakonisht të larta. Ai e vlerësoi këtë tregues si një “simbol nderi për shoqërinë izraelite”, i cili dëshmon qartë përkushtimin dhe dëshirën e fortë të qytetarëve për vlerat demokratike.