PDK hedh poshtë raportimet e RTK-së: Kërkojmë pafajësinë e krerëve të UÇK-së, jo uljen e dënimeve

Partia Demokratike e Kosovës ka reaguar ashpër ndaj transmetuesit publik, pasi ky i fundit raportoi në edicionin qendror se subjekti opozitar po kërkon “uljen e dënimeve” për ish-krerët e UÇK-së që po përballen me procesin gjyqësor në Hagë. Në një reagim zyrtar, PDK-ja e ka cilësuar këtë informacion si të pavërtetë, tendencioz dhe fyes për qëndrimin e saj politik. Partia thekson se pozicioni i saj është i qartë dhe i palëkundur: kërkohet drejtësi e plotë dhe lirimi i menjëhershëm i çlirimtarëve, duke kundërshtuar në tërësi aktgjykimin e shkallës së parë. Sipas PDK-së, angazhimi i tyre është i përqendruar në sigurimin e një mbrojtjeje sa më efikase për ish-krerët e UÇK-së gjatë fazës së apelit, duke kërkuar mbështetje institucionale nga shteti. Për këtë qëllim, partia ka iniciuar edhe ndryshime ligjore për Ligjin për Dhomat e Specializuara, të cilat synojnë përmirësimin e procesit dhe garantimin e të drejtave të të akuzuarve. “Nuk pranojmë që kërkesa jonë për drejtësi dhe lirim të plotë të paraqitet para publikut si kërkesë për ulje dënimesh”, thuhet në reagimin e PDK-së, duke shtuar se një shtrembërim i tillë i fakteve krijon përshtypjen e një agjende me prapavijë politike brenda redaksisë së transmetuesit publik. Si rrjedhojë, Partia Demokratike e Kosovës i ka bërë thirrje RTK-së që të ndërmarrë hapa urgjentë për korrigjimin e kronikës, sqarimin e qëndrimit të vërtetë të partisë dhe kërkimin e një faljeje publike për dezinformimin e shkaktuar ndaj opinionit publik.