Kriza te Manchester United, portieri Lammens tregon të vërtetën: Ja si qëndron puna me Carrick

Manchester United ka konfirmuar përkohësisht Michael Carrick në drejtimin e skuadrës, megjithëse situata te “djajtë e kuq” paraqitet mjaft e rëndë pas disfatave të fundit si në kampionat ashtu edhe në kompeticionet europiane. Pavarësisht përshtypjeve se ekipi vuan nga mungesa e bashkimit dhe harmonisë kolektive, portieri Senne Lammens ka dhënë një tjetër perspektivë. “Grupi është i bashkuar grupi në dhomat e zhveshjes. Është e lehtë t’i keqinterpretosh gjërat pas një ndeshjeje, kur lojtarët janë thellësisht të frustruar dhe e kuptoj këtë. Edhe unë jam i frustruar, sepse të gjithë duam vërtet të luajmë më mirë dhe të fitojmë”, u shpreh gardiani belg i United. Më tej, ai shtoi: “Ndonjëherë, nën ndikimin e emocioneve të momentit, mund të themi gjëra që nuk i mendojmë vërtet, ose nuk arrijmë t’i shpjegojmë siç duhet ato që duam të përcjellim”. “Njerëzit që shikojnë nga shtëpia nuk mund ta shohin atë që ndodh prapa skenave, ndaj duhet të sigurohemi që uniteti të jetë i dukshëm në fushë gjatë fundjavës. Por, mund t’ju siguroj se po bëjmë gjithçka që mundemi dhe jemi të gjithë të bashkuar: stafi, lojtarët dhe bordi në mbështetje të trajnerit“, theksoi Lammens. “Të gjithë e dinë se duhet të bëjmë më mirë, por besoj se jemi të bashkuar dhe po punojmë për t’u përmirësuar si ekip. Është e vështirë. Mund të përpiqesh të hartosh plane e taktika, por nëse pëson gol në minutën e parë apo të dytë, kjo praktikisht ta prish planin e lojës dhe e gjen veten duke ndjekur fitoren“, vijoi më tej ai. “Ne po përpiqemi çdo ditë e më shumë dhe po kërkojmë një zgjidhje. Ndonjëherë, kur gjërat nuk shkojnë siç duhet për ty, gjithçka shkon në favor të kundërshtarit. Mjafton një paraqitje e mirë për t’i ndryshuar gjërat. Pikërisht këtë synojmë dhe për këtë po punojmë jashtëzakonisht shumë tani”, përfundoi belgu.