Operacioni “Laboratori ‘25”: Prangoset edhe një person për krim të organizuar dhe falsifikim dokumentesh

Prokuroria Speciale e Republikës së Kosovës ka ndaluar për 48 orë një person të dyshuar, me inicialet B.K., në kuadër të hetimeve që po zhvillohen për rastin e njohur si “Laboratori ‘25”. Në njoftimin e përbashkët të lëshuar nga Policia e Kosovës dhe Prokuroria Speciale, bëhet e ditur se i dyshuari ngarkohet me veprat penale “Pjesëmarrja ose organizimi i grupit kriminal të organizuar” dhe “Falsifikimi i dokumentit”. Ky ndalim vjen si vazhdimësi e aksionit policor të zhvilluar më 21 janar 2025, kur autoritetet patën arrestuar një tjetër person nën dyshimet e ngjashme për përfshirje në falsifikim dokumentesh dhe aktivitete të krimit të organizuar. Ndërkohë, nga Prokuroria Speciale kanë bërë me dije se brenda afateve ligjore do t’i drejtohen Gjykatës Themelore në Prishtinë me kërkesë zyrtare për caktimin e masës së paraburgimit ndaj të dyshuarit. Organet e rendit dhe drejtësisë kanë theksuar se hetimet dhe veprimet e nevojshme operacionale për këtë çështje vijojnë intensivisht.