Tragjedi në agim në aksin Prezë-Vorë: Humb jetën 60-vjeçari pasi u përplas nga një makinë teksa shkonte në punë

Një ngjarje e rëndë me pasojë vdekjen ka ndodhur në orët e para të mëngjesit të sotëm në aksin rrugor që lidh Prezën me Vorën. Rreth orës 05:00, një 60-vjeçar ka ndërruar jetë tragjikisht pasi u godit nga një autoveturë. Sipas të dhënave, viktima është identifikuar si shtetasi Skënder Alushi, banues në fshatin Prezë. Ngjarja e dhimbshme u regjistrua në kryqëzimin rrugor që bashkon fshatin Ahmetaq me zonën e Prezës. Mësohet se 60-vjeçari kishte dalë në kryqëzim dhe po priste ndonjë automjet të rastit për të udhëtuar drejt vendit të punës. Në ato momente, një makinë që po lëvizte nga Preza në drejtim të Vorës e ka përplasur fuqishëm, duke i shkaktuar plagë të rënda trupore. Menjëherë pas goditjes, drejtuesi i automjetit e ka marrë të dëmtuarin me urgjencë për ta dërguar në spitalin e Vorës. Megjithatë, bluzat e bardha konfirmuan se ndërhyrja mjekësore ishte e pamundur, pasi 60-vjeçari kishte ndërruar jetë vetëm pak minuta pas përplasjes. Trupi i pajetë i viktimës është dërguar në morgun e Spitalit të Traumës për ekzaminimet e mëtejshme. Nga ana tjetër, shoferi i mjetit, i cili gjithashtu rezulton të jetë banor i fshatit Prezë, është vetëdorëzuar pranë organeve të policisë.