Tragjedia në Pejë: Sot protestë masive në Prishtinë, kërkohet shkarkimi i Sveçlës, Gërvallës dhe zyrtarëve të drejtësisë

Kryeqyteti do të bëhet sot arena e një proteste kombëtare, e cila nis në orën 16:00, si reagim ndaj vrasjes tronditëse të Arlinda Zekajt, e cila humbi jetën pasi u sulmua me sëpatë nga kunati i saj, megjithëse më parë i ishte drejtuar shtetit për mbrojtje, por kërkesa e saj kishte rënë në vesh të shurdhër. Organizimi i kësaj proteste vjen me thirrjen e Kolektivit për Mendim dhe Veprim Feminist, organizatë e cila ka bërë publike gjashtë kërkesa thelbësore, të cilat i ka cilësuar si ultimatume të panegociueshme për institucionet përgjegjëse. Në krye të listës së kërkesave që adresohen nga ky tubim është shkarkimi i menjëhershëm i Ministrit të Punëve të Brendshme, Xhelal Sveçla, i ministres së Drejtësisë, Donika Gërvalla, si dhe dorëheqja e detyrueshme e Kryetarit të Komunës së Pejës, Gazmend Muhaxheri. Po ashtu, lista e përgjegjësisë kërkon shkarkimin dhe nisjen e ndjekjes penale për disa nga figurat kryesore të drejtësisë dhe institucioneve lokale, përfshirë kryeprokuroren e Pejës, Lumturie Vuçetaj, prokuroren e çështjes Suada Rama Hamza, kryetarin e Gjykatës në Pejë Shemsedin Haxhiaj, gjykatësin Migjen Kastrati, ushtruesen e detyrës së Qendrës për Punë Sociale, Shpresa Lukaj, si dhe çdo zyrtar tjetër që rezulton i përfshirë në neglizhencën e rastit. Organizatorët kanë ngritur gjithashtu zërin për trajtimin e femicidit si një emergjencë kombëtare, duke kërkuar sigurimin e strehimit social të garantuar për të gjitha gratë që mbijetojnë nga dhuna me bazë gjinore. Për më tepër, protestuesit kërkojnë një proces vettingu të pavarur dhe pa ndikime partiake në sistemin e drejtësisë, si dhe legalizimin e së drejtës së vetëmbrojtjes për gratë. Arlinda Zekaj u vra tragjikisht të dielën e 25 tetorit, pasi kishte ngritur alarmin se jeta e saj ishte në rrezik dhe kishte kërkuar ndihmën e institucioneve, të cilat dështuan t'i dalin në mbrojtje. Autori i dyshuar i këtij krimi të rëndë, Albert Sylaj, u prangos nga organet e rendit dy ditë pas ndodhjes së ngjarjes.