Sulm terrorist në Beograd: Vritet personi që plagosi xhandarin para Ambasadës izraelite, reagon Daçiq

Një i mitur ka humbur jetën pasi ka sulmuar me armë të ftohta një pjesëtar të Xhandarmërisë serbe, i cili ishte i ngarkuar me sigurimin e Ambasadës së Izraelit në kryeqytetin serb, ka njoftuar zyrtarisht Ministria e Punëve të Brendshme e Serbisë. Sipas deklaratave të ministrit të Punëve të Brendshme, Ivica Daçiq, ngjarja ka ndodhur të mërkurën, më 28 tetor, rreth 15 minuta pas mesnatës. Autori i dyshuar i është afruar xhandarit duke mbajtur dy thika në duar dhe duke bërtitur “Allahu Akbar [Zoti është i madh]”, moment në të cilin zyrtari policor ka përdorur armën e zjarrit për të mbrojtur veten dhe objektin diplomatik, duke e lënë të vdekur sulmuesin. Daçiq e ka kualifikuar zyrtarisht këtë incident si një sulm terrorist, duke shtuar se i dyshuari kishte qenë paraprakisht në radarin e shërbimeve të sigurisë për shkak të lidhjeve të tij si simpatizant i organizatës terroriste Shteti Islamik. Si pasojë e këtij incidenti të rëndë, autoritetet e sigurisë në Serbi kanë vendosur ngritjen e nivelit të gatishmërisë ndaj kërcënimeve terroriste në shkallën e kuqe, e cila përfaqëson nivelin më të lartë të rrezikut. Kjo masë shoqërohet me shtim të ndjeshëm të forcave policore dhe intensifikim të kontrolleve në pikat strategjike në të gjithë territorin e vendit. Derisa hetimet vijojnë, autoritetet kompetente serbe ende nuk kanë zbuluar identitetin zyrtar të sulmuesit dhe as hollësi shtesë rreth rrethanave të ngjarjes. “Dua të përsëris edhe një herë se në sulmin terrorist të kryer sonte, një pjesëtar i Xhandarmërisë, i cili siguronte Ambasadën e Izraelit, u plagos lehtë dhe më pas e neutralizoi sulmuesin. Edhe pse identiteti i tij ende nuk është përcaktuar, shërbimi ynë e kishte mbajtur nën vëzhgim dhe dihet se ishte përkrahës i Shtetit Islamik. Në profilin e tij në Instagram mbante flamurin e zi dhe simbolin e Shtetit Islamik”, u shpreh ndër të tjera ministri Ivica Daçiq. Vlen të theksohet se Ambasada e Izraelit në Beograd është përballur edhe më parë me akte të ngjashme dhune. Në qershor të vitit 2024, një tjetër sulmues kishte plagosur rëndë me hark dhe shigjeta një pjesëtar të Xhandarmërisë që ruante të njëjtin mision diplomatik, incident i cili gjithashtu kishte përfunduar me vrasjen e sulmuesit gjatë ndërhyrjes së forcave të rendit.