Dominim total: Flamurtari shpallet fitues i Kupës së Federatës në basketboll për femra

Skuadra e basketbollit të femrave të Flamurtarit ka nisur mbarë sezonin e ri, duke u kurorëzuar si fituese e Kupës së Federatës. Në finalen e zhvilluar të dielën në mbrëmje, vlonjatet treguan forcën e tyre duke triumfuar bindshëm ndaj Partizanit. Në parketin e sallës sportive “Asllan Rusi”, përballja përfundoi me rezultatin e thellë 109-75 në favor të Flamurtarit. Që nga minutat e para, vajzat nga Vlora morën kontrollin e lojës, duke mbajtur një epërsi të vazhdueshme ndaj kundërshtareve të tyre. Ndonëse nga Partizani pritej një performancë më konkurruese, duke marrë parasysh angazhimet e rëndësishme që i presin në arenën ndërkombëtare, skuadra e kuqe ende shfaq shenja të fazës së kolaudimit. Përballë një Flamurtari më të organizuar dhe me një ritëm më të lartë loje, fitorja e vlonjateve ishte plotësisht e merituar. Ky sukses vjen pas një rrugëtimi të shkëlqyer në këtë kompeticion, ku Flamurtari regjistroi këto rezultate: Kupa e Federatës – Femra: Gjysmëfinalja: Flamurtari – Studenti, 65-35 Finalja: Flamurtari – Partizani, 109-75