Kritika të forta nga Louis van Gaal: UEFA po shkatërron Ligën e Kampionëve për para

Ish-trajneri i mirënjohur holandez, Louis van Gaal, ka lëshuar akuza të rënda në drejtim të shtëpisë së futbollit evropian, UEFA, duke e kritikuar pa doreza strukturën e re të Ligës së Kampionëve dhe duke theksuar se aspekti financiar ka lënë në hije vlerën sportive. Strategu i njohur e ka cilësuar skemën e re si absurde, duke argumentuar se kompeticioni më madhështor për klubet në kontinent duhet t'u rezervohet ekskluzivisht skuadrave më të fuqishme dhe elitare. “Është qesharake që UEFA e shpiku këtë format të garës. Në ditët e sotme, çdokush mund të marrë pjesë. UEFA mendon vetëm se si të fitojë para. Kjo botë është e korruptuar”, është shprehur Van Gaal. Sipas tij, një garë me një rreth më të ngushtë pjesëmarrësish do të sillte ndeshje shumë më superiore dhe do të ruante standardin e lartë të futbollit evropian. “Quhet Liga e Kampionëve, apo jo? Në të duhet të luajnë skuadrat më të mira. Do të kishte më pak diferenca në cilësi dhe më pak gola, por ndeshjet do të ishin të një niveli shumë më të lartë dhe futbolli do të ishte shumë më i mirë”, ka deklaruar holandezi. Kujtojmë se Liga e Kampionëve inauguroi një format krejtësisht të ri duke nisur nga edicioni 2024/25, duke zëvendësuar fazën tradicionale të grupeve me një sistem të vetëm prej 36 skuadrash, ku çdo ekip luan tetë sfida ndaj kundërshtarëve të ndryshëm. Megjithëse ky ndryshim u ndërmarr me qëllim shtimin e ndeshjeve dhe forcimin e konkurrencës, ai vazhdon të mbetet në qendër të debateve të zjarrta publike sa i përket ndikimit të vërtetë te cilësia e spektaklit dhe përfitimet monetare në futbollin kontinental.