Tragjedia në Monako: Arrestohet një person për vdekjen e mistershme të kushëririt të Princit Alberto II

Autoritetet policore në Monako kanë ndaluar dhe po marrin në pyetje një person, në kuadër të hetimeve për ndarjen e parakohshme nga jeta të 29-vjeçarit Antoine de Massy, i cili është kushëri i Princit Alberto II. Sipas informacioneve nga terreni, pamjet e siguruara nga kamerat e sigurisë kanë fiksuar personin në fjalë në afërsi të parkut ku u zbulua trupi i pajetë i të riut. Mbrëmjen e së hënës, organet e rendit vendosën zgjatjen e masës së ndalimit për këtë individ edhe për 24 orë të tjera. Viktiba Antoine de Massy, lindur nga martesa mes baronit Christian de Massy dhe Cecile Gelabale, kishte munguar në drekën tradicionale të familjes të organizuar të dielën, fakt ky që alarmoi menjëherë të afërmit e tij. Pas sinjalizimit të dhënë, policia nisi menjëherë operacionin e kërkim-shpëtimit. Pas disa orësh kërkimesh, trupi i pajetë i 29-vjeçarit u lokalizua në një park të vendosur përgjatë bulevardit Larvotto, në zonën prapa Villa Sauber brenda territorit të Monakos. Ndërkohë, strukturat kompetente kanë hapur një dosje hetimore për të hedhur dritë mbi shkaqet dhe rrethanat e sakta të kësaj ngjarjeje tronditëse. Deri në këto momente, nuk ka ende një komunikatë zyrtare lidhur me dinamikën se si ka ndodhur fatkeqësia. Pas marrjes së lajmit të rëndë, Princi Alberto II dhe bashkëshortja e tij, Princesha Charlene, kanë bërë publike ndjenjat e tyre të pikëllimit të thellë për humbjen e parakohshme të njeriut të tyre të afërt. Procesi hetimor vijon intensivisht me synimin për të zbardhur plotësisht të vërtetën, ndërsa personi i ndaluar mbetet nën pyetjet e hetuesve për të kuptuar rolin e tij të mundshëm në këtë ngjarje.