Analisti Sermaxhaj: Superliga e paparashikueshme, fati i Kombëtares në duart tona

Ecuria e 11 xhirove të para në elitën e futbollit vendor dhe sfidat e ardhshme të Përfaqësueses së Kosovës në Ligën B të Kombeve, të cilat do të zhvillohen gjatë muajit nëntor, onë qendër të vëmendjes së analistit sportiv, Genc Sermaxhaj. Gjatë një analize për ecurinë e Superligës së Kosovës, Sermaxhaj ka vlerësuar se edicioni aktual karakterizohet nga një garë tejet interesante dhe rezultate befasuese, duke përmendur gjithashtu edhe skuadrat që po rrezikojnë ruajtjen e statusit elitar, krahas atyre që po kryesojnë tabelën. Sipas tij, sa i përket Kombëtares së Kosovës, sfida e nëntorit është përcaktuese për realizimin e objektivave, ndërsa theksoi se fati i skuadrës kombëtare varet tërësisht nga vetë paraqitjet e saj në fushën e blertë. Lajmet e Reja: Si i vlerësoni 11 javët e para të garave në elitën e futbollit kosovar? Genc Sermaxhaj: Faza fillestare e Superligës ka qenë mjaft cilësore dhe tërheqëse, kryesisht për shkak të paparashikueshmërisë mes skuadrave. Fitoret dhe humbjet e papritura e kanë gjallëruar garën, duke e bërë atë interesante për secilin ekip. Lajmet e Reja: Cilat skualra paraqitën befasi pozitive, e cilat ju zhgënjyen? Genc Sermaxhaj: Për sa i përket anës pozitive, pa dyshim që veçohen Malisheva dhe Prishtina që mbajnë kreun e renditjes, ndërsa zhgënjim ka pasur nga disa skuadra si Ballkani, Gjilani, Llapi dhe Drita në xhirot e para, edhe pse kjo e fundit ka nisur tashmë këndelljen. Lajmet e Reja: A kanë kapacitete të mjaftueshme Prishtina dhe Malisheva për të ruajtur hapin drejt titullit deri në fund? Genc Sermaxhaj: Të dyja këto ekipe posedojnë cilësi dhe përbërje të mirë lojtarësh për të vazhduar kryesimin, mirëpo kampionati është i gjatë dhe gjithçka mund të ndodhë deri në fund. Lajmet e Reja: Cilat formacione rrezikojnë më shumë rënien nga kategoria? Genc Sermaxhaj: Vushtrria dhe Llapi janë dy skuadrat më të rrezikuara aktualisht. Ato nuk po shfaqin lojë të qëndrueshme dhe as rezultatet e duhura, çka do t'ua vështirësojë dukshëm rrugëtimin në vazhdim. Lajmet e Reja: Jemi pranë muajit nëntor, ku Kosova luan dy ndeshje vendimtare në Ligën B të Kombeve, sa janë shanset për vendin e dytë? Genc Sermaxhaj: Përfaqësuesja jonë ka gjasa shumë të mira për të vazhduar tutje, pasi tashmë ka grumbulluar pesë pikë dhe mban pozitën e dytë në tabelë. Është e qartë se fati i Kosovës është tërësisht në duart e veta. Lajmet e Reja: Më 14 nëntor luhet ndeshja në Prishtinë kundër Izraelit dhe më 17 nëntor ajo në fushën e Republikës së Irlandës, a synoni pikë të plota? Genc Sermaxhaj: Përballja me Izraelin në shtëpi përbën testin e parë të muajit dhe mundësinë më të mirë për triumf. Nëse kjo ndeshje mbyllet me fitore, atëherë situata me Irlandën mund të qartësohet plotësisht, sidomos duke pasur parasysh se irlandezët nisin ndeshjet e nëntorit kundër Austrisë. Lajmet e Reja: Ku konsiston pika më e fortë e Kosovës? Genc Sermaxhaj: Forca kryesore e Kombëtares qëndron në repartin e mbrojtjes. Ajo ka dëshmuar stabilitet dhe cilësi të lartë edhe në mungesë të Rrahmanit, ndërkohë që edhe mesfusha e sulmi funksionojnë në nivel optimal. Lajmet e Reja: A besoni se ky brez lojtarësh do të lërë gjurmë historike në të ardhmen e afërt me Përfaqësuesen? Genc Sermaxhaj: Kosova ka nisur gradualisht procesin e përtëritjes së skuadrës dhe ekziston një mundësi e madhe që këta djem të shkruajnë histori me fanellën kuqezi në të ardhmen e afërt.