Roma pa argjentinasin: Paulo Dybala jashtë planeve edhe për sfidën e sotme

Paulo Dybala nuk do të mund të ndihmojë Romën në ndeshjen e mbrëmjes së sotme kundër Cagliarit në Serie A, pasi sulmuesi nuk ka arritur të rikuperohet plotësisht nga dëmtimi. Klubi kryeqytetas ka bërë publike listën e futbollistëve të grumbulluar, ku trajnerësi Gian Piero Gasperini ka vendosur ta lërë jashtë skuadrës pas seancës së fundit stërvitore të zhvilluar në qendrën e Trigorisë. Sipas informacioneve nga media italiane, 32-vjeçarit i duhet edhe pak kohë dhe disa stërvitje shtesë për të fituar formën e plotë fizike para se të kthehet në fushën e blertë për ndeshjet zyrtare. Dybala ka qenë mungesë e ndjeshme për verdhekuqtë në tri takimet e fundit për shkak të një problemi në pulpë, ndërkohë që gjatë këtij edicioni ka arritur të kontribuojë me katër asistime në gjashtë paraqitje në të gjitha kompeticionet. Stafi teknik dhe drejtuesit e Romës synojnë që sulmuesi kryesor të jetë gati për sfidën e kampionatit kundër Udineses, e cila do të luhet të shtunën e ardhshme, para përballjes tepër të rëndësishme evropiane kundër Manchester Unitedit, që do të zhvillohet më 3 nëntor në stadiumin “Old Trafford”. Ndeshja mes Romës dhe Cagliarit do të nisë sonte, me fillim nga ora 20:45.