Gjiganti spanjoll synon mesfushorin e Liverpoolit, zbulohet plani i bujshëm në merkaton e ardhshme

Klubi i Real Madridit ka piketuar Alexis Mac Allister si objektivin kryesor për të rifreskuar repartin e mesfushës. Drejtuesit e klubit mbretëror e kanë vënë argjentinasin në qendër të vëmendjes për edicionin e ardhshëm futbollistik. Sipas informacioneve të siguruara nga “Sky Sport”, ky operacion ka mbështetjen e plotë të trajnerit Jose Mourinho, i cili e konsideron 27-vjeçarin si elementin kyç që do t'i sjellë ekuilibër, kreativitet dhe stabilitet taktik skuadrës. Nga ana tjetër, drejtuesit e Liverpoolit nuk do të heqin dorë lehtë nga shërbimet e tij, pasi mesfushori është i lidhur me një kontratë afatgjatë që skadon në qershor të vitit 2028. Që prej transferimit të tij nga Brighton në vitin 2023, Mac Allister ka lënë gjurmë të rëndësishme te anglezët, duke kontribuar me 23 gola dhe 21 asiste në 162 ndeshje zyrtare. Megjithatë, situata aktuale e bisedimeve për rinovimin e marrëveshjes, të cilat ende nuk kanë nisur, lë hapësirë për optimizëm te kampioni i Spanjës për të tentuar një lëvizje konkrete në të ardhmen.