Ultimatumi i Kurtit: Sveçla dhe Gërvalla kanë 54 orë kohë për të dorëzuar raportin mbi dështimet institucionale në rastin e tronditshëm të Arlinda Zekajt

Kryeministri i vendit, Albin Kurti, gjatë një paraqitjeje publike nga Klinika e Kardiologjisë në Qendrën Klinike Universitare të Kosovës (QKUK), është prononcuar lidhur me vrasjen tragjike të Arlinda Zekajt në fshatin Vitomiricë, një ngjarje që ka tronditur thellë opinionin publik. Rasti i ndjerës ka nxjerrë në pah një seri lëshimesh dhe neglizhence të theksuar nga ana e mekanizmave shtetërorë, përfshirë policinë, prokurorinë, gjykatat dhe Qendrat për Punë Sociale (QPS), të cilat nuk reaguan si duhet pavarësisht denjësimeve të herëpashershme për dhunë në familje, presion dhe kërcënime serioze me jetë. I pyetur nga gazetarët se si mund të ndihen të sigurta gratë në një vend ku institucionet dështojnë t'u ofrojnë mbrojtjen e duhur, kreu i ekzekutivit shprehu ngushëllimet më të sinqerta për familjen Zekaj dhe bashkëndjeu me thirrjen e tyre për drejtësi. Ai theksoi se reforma në sistemin e drejtësisë tashmë nuk është thjesht një prioritet, por një nevojë emergjente. Sipas tij, raportet ndërkombëtare të Bashkimit Evropian ndër vite kanë kritikuar vazhdimisht mungesën e funksionimit të duhur të drejtësisë në Kosovë. "Ne duhet ta drejtojmë drejtësinë, të nderuar gazetarë, sepse aktualisht nuk e kemi të drejtë, për të mos thënë se e kemi të shtrembër", u shpreh Kurti, duke shtuar se hetimet u takojnë hetuesve, aktakuzat prokurorëve dhe gjykimet gjykatësve. Ai bëri të ditur se Ministria e Drejtësisë dhe Ministria e Punëve të Brendshme kanë në dispozicion vetëm 54 orë për të përgatitur dhe dorëzuar një raport të detajuar mbi këtë tragjedi. Ky afat kohor, sipas kryeministrit, vjen si vazhdimësi e votimit të Rezolutës në seancën e kaluar parlamentare dhe synon të zbardhë deri në fund përgjegjësinë e secilës hallkë të zinxhirit institucional që dështoi të veprojë. Po ashtu, raporti do të trajtojë edhe rastet e tjera të ngjashme ku gratë viktimë të dhunës vazhdojnë të mbeten të rrezikuara nga keqbërësit. Kurti paralajmëroi se do të ndërmerren masa të rrepta konform ligjeve dhe rregulloreve në fuqi, duke vënë në pah se shpejtësia e reagimit institucional tani është parësore. Për më tepër, ai e cilësoi Arlinda Zekajn si një dëshmore të betejës për drejtësi në Republikën e Kosovës, duke riafirmuar angazhimin e plotë të shtetit për të vënë përgjegjësit para ligjit, qofshin ata hetues, prokurorë apo gjyqtarë.