Boykoti i opozitës në Kuvend, Vokshi lëshon akuza të forta ndaj mazhorancës: Mbrohet Belinda Balluku ndërsa arrestohen qytetarët

Për të dytën ditë radhazi, deputetët e opozitës kanë vijuar bojkotin e komisioneve parlamentare, duke zgjedhur të dërgojnë vetëm nga një përfaqësues në mbledhje për të përcjellë mesazhin se vendi ndodhet në një situatë ku normaliteti institucional është cenuar rëndë. Gjatë punimeve të Komisionit për Evropën dhe Punët e Jashtme, deputetja demokrate Albana Vokshi ka ngritur shqetësimin mbi funksionimin e jetës parlamentare, duke sjellë në vëmendje rastin e ish-zëvendëskryeministres Belinda Balluku. Vokshi u shpreh se institucionet nuk mund të vijojnë punën normalisht kur vendi zhytet në krizë, duke denoncuar faktin se qytetarët përfundojnë në pranga për shkak të protestave, ndërkohë që ish-numri dy i qeverisë mbrohet nga kartonët e deputetëve të mazhorancës. Nga ana e tij, kryetari i komisionit dhe deputeti socialist, Igli Hasani, iu kundërpërgjigj akuzave të opozitës, duke theksuar se çdo anëtar i Kuvendit ka marrë mandatin përmes një procesi të lirë dhe demokratik. Gjatë debatit të tensionuar, Vokshi shtoi se situata nuk mund të trajtohet sikur nuk ka ndodhur asgjë, sidomos kur protestat vijojnë prej katër muajsh dhe, sipas saj, në dy javët e fundit është vënë re një dhunë e paprecedentë. "Nuk mund të dënohet qytetari që proteston, ndërsa tjetra që përflitet për pasuri të jashtëzakonshme të mbrohet me votat dhe kartonët tuaj, duke mos iu hequr imuniteti dhe duke mos u arrestuar, por përkundrazi duke emëruar ministra, drejtorë policie e drejtues në qarqe," deklaroi ndër të tjera deputetja demokrate. Ajo nuk la pa përmendur as zgjedhjet e vitit 2025, për të cilat tha se janë manipuluar përmes përfshirjes së bandave kriminale, duke shtuar se ky parlament nuk pasqyron vullnetin e qytetarëve, por të krimit të organizuar. Në kundërpërgjigjen e tij, kryetari i komisionit Igli Hasani u shpreh se të gjithë deputetët e pranishëm në Kuvend, përfshirë edhe ata të opozitës, janë zgjedhur në mënyrë të lirë. Ai shtoi se përfaqësuesit e Partisë Socialiste gëzojnë mbështetjen e elektoratit që prej vitit 2013 dhe se thirrjet për shpërndarjen e parlamentit nuk marrin përgjigje. Hasani përfundoi se nëse opozita dëshiron të heqë dorë nga mandatet, është e lirë ta bëjë këtë, ndërsa puna e komisionit do të vijojë normalisht.