Tragjedia në Pejë: Rrëzohet propozimi i Ganimete Musliut për raportim urgjent të Gazmend Hoxhës javën e ardhshme

Kërkesa e deputetes së Partisë Demokratike të Kosovës (PDK), Ganimete Musliu, e cila kërkoi që drejtori i Policisë së Kosovës, Gazmend Hoxha, të ftohej javën e ardhshme në Komisionin për Çështje të Sigurisë dhe Mbrojtjes për të raportuar lidhur me vrasjen e Arlinda Zekajt në Pejë, nuk ka gjetur mbështetje. Megjithëse Musliu insistoi se prania e Policisë është e domosdoshme për të hedhur dritë mbi veprimet institucionale dhe për të shmangur çdo dilemë rreth rastit, kryetari i komisionit, Mefail Bajqinovci, bëri të ditur se kreu i Policisë do të paraqitet për të raportuar para deputetëve vetëm pas katër javësh. Duke arsyetuar kërkesën e saj, deputetja Musliu theksoi se qëllimi nuk është drejtimi i gishtit apo fajësimi i strukturave policore, por mbrojtja dhe sqarimi i plotë i rrethanave, duke shtuar se nëse gjithçka ka shkuar në rregull, atëherë duhet të hiqen të gjitha pikëpyetjet e ngritura. Në krahun tjetër, kryetari i komisionit, Mefail Bajqinovci, njoftoi se për këtë çështje do të ngrihet një komision hetimor i dedikuar, i cili do të merret me zbardhjen e përgjegjësive institucionale dhe për të kuptuar nëse ka pasur neglizhencë në rastin e viktimës. Ndërkohë, deputetja e Lëvizjes Vetëvendosje, Shqipe Selimi, e cila e cilësoi ngjarjen si tejet tronditëse, bëri thirrje që institucionet ligjzbatuese dhe ato sociale t'i trajtojnë me seriozitetin maksimal rastet e dhunës në familje, duke kërkuar angazhim të përbashkët të secilit mekanizëm. Pavarësisht diskutimeve dhe insistimit të opozitës, mbledhja përfundoi me konfirmimin e Bajqinovcit se drejtori i Policisë së Kosovës do të ftohet për të raportuar përpara komisionit pas një periudhe prej katër javësh.