Bojkoti i avokatëve shtyn sërish seancën për kryebashkiakun Erion Veliaj

Procesi gjyqësor ndaj kryetarit të Bashkisë së Tiranës, Erion Veliaj, është shtyrë për shkak se avokatët e siguruar përmes skemës së ndihmës juridike falas kanë refuzuar që ta mbrojnë atë. Ky vendim vjen si pasojë e bojkotit të shpallur nga Dhoma e Avokatisë, sipas informacioneve të siguruara nga gazetarja Anila Hoxha. Sipas vendimit të trupës gjykuese, seanca e radhës është caktuar të mbahet më 3 nëntor, në orën 10:30, duke lënë sërish pezull çështjen. Në seancën e mëparshme, gjykata kishte vendosur të caktojë mbrojtës ligjorë nga skema e ndihmës juridike falas pranë Ministrisë së Drejtësisë, me qëllim garantimin e së drejtës për mbrojtje të Veliajt. Megjithatë, këta të fundit nuk kanë pranuar ta përfaqësojnë, duke iu bashkuar protestës së përgjithshme të trupës së avokatëve. Prej datës 8 shtator, Dhoma e Avokatisë ka ndërmarrë një bojkot të përgjithshëm të të gjitha seancave gjyqësore në Gjykatën e Posaçme kundër Korrupsionit dhe Krimit të Organizuar (GJKKO). Shkak i këtij reagues të fortë është bërë miratimi i rregullores së re të GJKKO-së, e cila sipas komunitetit të avokatëve shkel hapur të drejtat e mbrojtjes dhe pengon ushtrimin e lirë të profesionit të tyre. Për t'i dhënë zgjidhje këtij ngërçi, përfaqësuesit e avokatisë kanë ndërmarrë hapa ligjorë duke iu drejtuar Gjykatës Kushtetuese me një padi formale, ku kërkojnë shfuqizimin e kësaj rregulloreje dhe pasojave të saj. Ndërkohë, vetë kryebashkiaku i Tiranës kishte depozituar një shkresë zyrtare ku shprehte vullnetin që të mbrohej ekskluzivisht nga avokati i tij personal, Plarent Ndreca, duke refuzuar çdo përfaqësim tjetër. Në anën tjetër, avokatët e caktuar kryesisht nga Gjykata e Posaçme nuk janë paraqitur në sallë, por përmes njoftimeve me shkrim kanë konfirmuar se janë pjesë e bojkotit ndaj GJKKO-së, institucion i cili nuk ka aplikuar masa administrative apo gjoba ndaj tyre për këtë mungesë.