Operacioni “Fireworks 3”: Të paktën 1853 fishekzjarre për protestat e dhunshme, pranga 51-vjeçarit në Tiranë

Autoritetet policore në kryeqytet kanë vënë në pranga një 51-vjeçar, pasi gjatë kontrollit në një magazinë që ai administronte pranë “Tregut Çam” u zbuluan dhe u sekuestruan 1853 copë fishekzjarre, të cilat dyshohet se siguroheshin për t'u shpërndarë gjatë protestave të fundit. Sipas informacioneve zyrtare nga uniformat blu, i arrestuari dyshohet se ka furnizuar me lëndë piroteknike individë të maskuar, të cilët janë përfshirë në akte dhune gjatë tubimit të zhvilluar më 24 tetor 2026. Ky aksion vjen si vazhdim i operacionit të koduar “Fireworks 3”, që synon goditjen e rrjeteve që furnizojnë protestuesit me mjete të palejuara për të sulmuar efektivët e policisë dhe pronat publike e private. Ndërhyrja e specialistëve të Seksionit për Hetimin e Krimeve Ekonomiko-Financiare çoi në kapjen në flagrancë të shtetasit D. K., 51 vjeç, në ambientet e magazinës së tij në rrugën “Çamëria”. Gjatë verifikimeve, rezultoi se i dyshuari nuk posedonte asnjë leje apo dokumentacion përkatës për tregtimin dhe origjinën e këtyre mallrave. Kujtojmë se vetëm një ditë më parë, Policia e Tiranës sekuestroi gjithashtu 47 pako me fishekzjarre në një banesë në rrugën “Zela”, të cilat gjithashtu destinoheshin për qëllime të paligjshme. Në përfundim të veprimeve të para hetimore, materialet procedurale i kanë kaluar Prokurorisë për ndjekjen e mëtejshme ligjore.