Superliga e Basketbollit/ Tirana udhëheq me stil, Flamurtari dhe Vllaznia shkëlqejnë në transfertë

Kanë rënë siparin ndeshjet e javës së tretë në kampionatin e Superligës së femrave në basketboll, ku skuadra e Tiranës vazhdon të ruajë kreun e renditjes me pikë të plota, pas një paraqitjeje bindëse në parket. Vajzat bardheblu, të drejtuara nga trajnerja Alibegaj, nuk e vunë asnjëherë në dyshim fitoren përballë Sopoti Eagles, duke triumfuar pastër me shifrat 71-53. Përballja e zhvilluar në kryeqytet pati pak histori, pasi vendaset kontrolluan lojën nga fillimi deri në fund. Nga ana tjetër, skuadra debutuese e Sopoti Eagles, pavarësisht paraqitjes prej 17 pikësh e 10 kërcimesh nga Pulaj, mbetet në fund të tabelës, ende në kërkim të suksesit të parë sezonal. Një nga sfidat më dramatike të kësaj juve u luajt në kryeqytet mes Studentit dhe Vllaznisë, dy skuzëra me objektiva të qarta për zonën 'play-off'. Shkodranet arritën të sigurojnë një fitore tepër të rëndësishme në sekondat e fundit me rezultatin e ngushtë 61-63. Për Studentin nuk mjaftuan 20 pikët e shënuara nga Pëllumbi, ndërsa te Vllaznia protagonistja kryesore ishte Rreshpja, e cila udhëhoqi skuadrën drejt triumfit me 19 pikë të realizuara. Kampionët në fuqi të Flamurtarit kanë regjistruar një tjetër fitore komode në transfertë, duke mposhtur Partizanin me rezultatin e thellë 89-56. Për vlonjatet, ky sukses shënon fitoren e dytë në kampionat, duke konfirmuar edhe një herë pretendimet e tyre serioze për mbrojtjen e titullit. Rezultatet e javës së 3-të në Superligën e Femrave: Studenti – Vllaznia, 61-63 Partizani – Flamurtari, 56-89 Tirana – Sopoti Eagles, 71-53 Renditja aktuale pas tri javëve: Tirana 6 pikë, Vllaznia 5 pikë, Flamurtari 5 pikë, Partizani 4 pikë, Studenti 4 pikë, Sopoti Eagles 3 pikë.