Luksi në zemër të Manhattan-it: Ish-avokatja e Trump kurorëzon dashurinë me biznesmenin turk në një dasmë përrallore

Alina Habba, ish-prokurorja e New Jersey-t dhe këshilltarja ligjore e Donald Trump, ka nisur një kapitull të ri në jetën e saj, duke u martuar me sipërmarrësin turk Turhan Mildon. Mildon është një figurë e njohur në botën e biznesit, duke drejtuar Miller Holding, një kompani me shtrirje të gjerë në sektorët e energjisë, minierave dhe ndërtimit. Kurorëzimi i dashurisë së çiftit u mbajt në ambientet prestigjioze të hotelit 'Waldorf Astoria' në Manhattan. Salla madhështore, e vendosur në katin e katërt të objektit, u shndërrua në një mjedis magjepsës, i stolisur me pemë qershie në lulëzim dhe qindra trëndafila të kuq, duke krijuar një atmosferë tejet elegante. Edhe pse shifrat zyrtare nuk janë bërë publike, ekspertët e eventeve vlerësojnë se shpenzimet për organizimin – duke përfshirë qiranë e sallës, dekorin dhe muzikën – i kalojnë 1 milion dollarët, një shumë që nuk përfshin akomodimin e të ftuarve. Menysë së pasur nuk i munguan pjatat e sofistikuara si havjari 'Kraliyet Ossetra', rizoto me karavidhe, bonfile dhe shampanja luksoze 'Dom Pérignon'. Çifti, i cili e organizoi gjithçka në harkun kohor të tre muajve, fillimisht kishte planifikuar ta mbante dasmën në hotelin historik 'Plaza', por për shkak të mungesës së disponueshmërisë, zgjodhën 'Waldorf Astoria'-n. Në këtë sipërmarrje, ata u asistuan nga dy prej organizatorëve më të njohur të eventeve nga Palm Beach. Në listën e të ftuarve figuronin emra të rëndësishëm të politikës dhe drejtësisë amerikane, përfshirë këshilltaren speciale të komunikimit, Margo Martin, drejtorin e FBI-së, Kash Patel, si dhe sekretarin amerikan të Drejtësisë, Todd Blanche. Në mesin e personaliteteve të pranishme ishte edhe legjenda e boksit, Mike Tyson. Ndërkaq, Donald Trump nuk ishte i pranishëm në ceremoni, pasi ndodhej në Knoxville të Tennessee-t për të ndjekur një ndeshje të futbollit amerikan universitar. Historia e dashurisë mes 42-vjeçares Habba dhe 29-vjeçarit Mildon u bë publike për herë të parë në prill të këtij viti, gjatë darkës së korrespondentëve të Shtëpisë së Bardhë. Më vonë, dyshja u shfaqën së bashku edhe në festimet e 4 Korrikut, të organizuara nga një klub privat në Washington.